Is-sharaǵa ǵalymdar, etnograftar, mádenıettanýshylar, kreatıvti ındýstrııa ókilderi, qoǵam jáne memleket qaıratkerleri, sondaı-aq jastar jáne volonterlik uıymdardyń, buqaralyq aqparat quraldary men medıa-sarapshylar qatysty.
Semınar barysynda Premer-mınıstrdiń orynbasary – Mádenıet jáne aqparat mınıstri Aıda Balaevanyń quttyqtaý sózin Mádenıet jáne aqparat vıse-mınıstri Evgenıı Kochetov oqyp berdi. Quttyqtaý hatta Memleket basshysynyń Ulttyq quryltaıda óner men mádenıetti memlekettiń strategııalyq baǵyty retinde atap ótkeni aıtyldy.
«Jańa tehnologııalar, sıfrlyq orta jáne jasandy ıntellekt memleketterdiń, ekonomıkalardyń jáne qoǵamdardyń damý baǵytyn barǵan saıyn aıqyndaı túsýde. Osyndaı tehnologııalyq serpilis jaǵdaıynda ulttyq mádenı kodty joǵaltpaý, tól bolmysymyzdy saqtaý – asa mańyzdy mindet», delingen quttyqtaý hatta.
Semınar aıasynda tarıh ǵylymdarynyń doktory Jambyl Artyqbaev, sýretshi, dızaıner, «Qazaq oıýlary» kitabynyń avtory Erlan Qojabaev, dızaıner Farıda Merhamıtqyzy baıandama jasady. Sarapshylar sońǵy jyldary qazaq dúnıetanymyna tán emes, ulttyq bolmystan alshaq keıbir qubylystardyń «dástúr» retinde nasıhattalyp júrgenine nazar aýdardy. Ásirese ulttyq oıý-órnekterdi oryndy ári maǵynalyq turǵyda durys qoldaný máselesi kóterilip, áıelderge tán oıý-motıvterdiń erler kıiminde jıi paıdalanylýy synǵa alyndy. Sonymen qatar qazaq mádenıetine jat elementterdiń ulttyq mura retinde usynylýy da talqylandy.
Budan bólek, áleýmettik jeliler arqyly keńinen taralyp júrgen, alaıda tarıhı negizi joq «jańa dástúrlerdiń» qoǵam sanasyna áseri sóz boldy. Mamandar mundaı úrdister qalyptasqan mádenı normalar men qundylyqtarǵa keri yqpal etip, tól salt-dástúrdiń mánin burmalaıtynyn atap ótti. Is-shara barysynda dástúrlerdi kommersııalaý máselesi de kóterildi
Semınardy qorytyndylaı kele qatysýshylar ulttyq mádenı murany saqtaý men damytýda ǵylymı negizge súıený, jaýapty kózqaras qalyptastyrý, sondaı-aq dástúr men zamanaýılyqtyń úılesimin qamtamasyz etý qajettigin atap ótti.
