Jastar jalynynyń jarqyly

Jastar qashanda jańashyl, ilgeri kúnderden úlesin alýdan úmitti, bastamashyl bolyp keledi. Buǵan jastardyń shyǵarmashylyq turǵydan órkendeýine jaǵdaı jasap, daryndy jastardy anyqtap, oblystyń mádenı-qoǵamdyq ómirine belsene aralasýyna yqpal etýdi kózdeıtin «Jastar jalyny-2015» shyǵarmashylyq jobasy anaǵurlym serpin berip keledi. Oblystaǵy talantty jas­tardyń jańa belesterdi baǵyn­dyrýǵa degen ynta-jigerleri bıyl da erekshe. Jobaǵa 1000-ǵa jýyq shyǵarmashyl jastar qatysqan. Tahaýı Ahtanov atyn­daǵy oblystyq drama teatrynyń konsert zalynda ótken «Jastar jalyny-2015» shyǵarmashylyq jobasynyń qorytyndy gala-konserti osyny ańǵartty. Gala-konsertti qysqasha sóz sóılep ashqan oblystyq jas­tar saıasaty máseleleri bas­qarmasynyń basshysy Darıǵa Ismaǵambetova bıylǵy «Jastar jalyny-2015» jobasynyń Elbasy Nursultan Ábishuly Nazarbaevtyń «100 naqty qadam» Ult jospary negizinde Qazaqstan halqy Assambleıasynyń jáne Qazaqstan Respýblıkasy Kon­stıtýsııasynyń 20 jyldyǵy, Qazaq handyǵynyń 550 jyldyǵy, Uly Jeńistiń 70 jyldyǵy aıasynda shyǵarmashyl jastardy biriktirip otyrǵanyn jetkizdi. – Jastar – elimizdiń erteńi. Olardyń qoǵam damýyna erkin aralasýy úshin elimizde tolyq jaǵdaı jasalǵan. Elbasy Nursultan Nazarbaev jastarǵa qashanda senim artyp, qoldap keledi. Qazir elimizde jastar máselelerin sheshýge baǵyttalǵan sátti qadamdar jeterlik. Sonyń biri osy –«Jastar jalyny-2015» jobasy der edim. Bul joba bizdiń óńirde oıdaǵydaı júzege asty, qanshama jas talanttar men bastamashyl jastardyń ózin kórsetýlerine jol ashyldy, – dedi ol. Shyǵarmashylyq joba aıasynda ótken «Sheksiz shyǵar­mashylyq» oblystyq baıqaýynda aqtóbelik Aııa Spambetova, «Túrimiz basqa, tilegimiz bir» baıqaýynda mártóktik Regına Pashbekova, «Meniń mamandyǵym – meniń maqtanyshym» baıqaýyn­da shalqarlyq Araılym Jana­man, «Namysty jastar» baı­qaýynda oıyldyq Erbolat Esenbek, «Street workout» oblys­tyq baıqaýynda aqtóbelik Islam Sabyrov jeńimpaz boldy. Al, «Biz Aqtóbeniń talanttarymyz» oblystyq baıqaýynda on atalym boıynsha otyzǵa jýyq jas júldeger atandy. Gala-konsert barysynda ob­lystyq jastar saıasaty máse­leleri basqarmasynyń basshysy D.Ismaǵambetova joba aıasynda ótken baıqaý jeńimpazdary men júldegerlerin I, II, III dárejeli dıplomdarmen jáne baǵaly syılyqtarmen marapattady. – Men Oıyl halyq tea­trynyń rejısseri bolyp jumys isteımin. Osyndaǵy «Jas talap» drama úıirmesiniń toǵyz múshesiniń kúshimen «Namysty jastar» teatr janry boıynsha baıqaýǵa qatysyp, onda Muhtar Áýezov pen Áljappar Ábishevtiń «Namys gvardııasy» pesasynan kórinis qoıdyq. Búgin baıqaýdan birinshi oryn alyp, qýanyp turmyz. Bul bizdi jańa tabystarǵa jeteleıdi, – deıdi Oıyl halyq teatrynyń rejısseri Erbolat Esenbekuly. Saltanatty shara jeńim­pazdar men júldegerler oryn­daǵan ásem ánmen, kúmbirlegen kúımen jáne myń buralǵan bımen bederlendi. Satybaldy SÁÝIRBAI, «Egemen Qazaqstan». Aqtóbe oblysy.