Foto: gov.kz
Qarjy mınıstrligi apparatynyń basshysy Ernar Erjanov «Áleýmettik medısınalyq saqtandyrý qory» KEAQ ujymyna basqarma tóraǵasy qyzmetine taǵaıyndalǵan Gúlmıra Sabdenbekti tanystyrdy.
«Onyń beıindi medısınalyq bilimi bar, qoǵamdyq densaýlyq saqtaý magıstri (MPH) dárejesin alǵan, sondaı-aq densaýlyq saqtaý salasynda basqarýshylyq tájirıbesi mol. Ár jyldary jetekshi laýazymdardy atqaryp, Ulttyq medısınalyq holdıngtiń strategııalyq damý departamentin basqardy, «Ulttyq ǵylymı kardıohırýrgııa ortalyǵy» AQ basqarma tóraǵasynyń orynbasary boldy», dep habarlady Qarjy mınıstrliginiń baspasóz qyzmeti.
Buǵan deıin Prezıdent Ákimshiliginiń áleýmettik-ekonomıkalyq saıasat bólimi meńgerýshisiniń orynbasary qyzmetin atqarǵan Gúlmıra Sabdenbek áleýmettik saıasat pen ornyqty damý, memlekettik aýdıt jáne qarjylyq baqylaý máselelerine jetekshilik etken.
Qor ujymyna basqarma tóraǵasynyń birinshi orynbasary retinde Aıdar Mekebekov te tanystyryldy.
Onyń Qarjy mınıstrligi júıesinde kópjyldyq eńbek ótili bar. Eńbek jolyn salyq ınspektorynan bastap, memlekettik kirister jáne qarjylyq baqylaý organdarynyń bólimshelerin basqarýǵa deıin kóterilgen. Qarjy mınıstrliginiń Qarjylyq monıtorıng komıteti tóraǵasynyń orynbasary qyzmetin atqarǵan. Búginge deıin «Qazaqmys korporasııasy» JShS-de urlyqqa qarsy is-qımyl departamentiniń dırektory bolǵan.
«Áleýmettik medısınalyq saqtandyrý qorynyń qyzmeti halyqtyń naqty qajettilikterin eskere otyryp, qarjy qarajatyn maqsatty ári ashyq bólýge, sondaı-aq sapaly medısınalyq kómekti qamtamasyz etýge baǵyttalady», delingen Qarjy mınıstrliginiń baspasóz habarlamasynda.
Eske salaıyq, buǵan deıin Áleýmettik medısınalyq saqtandyrý qoryn tekserý barysynda júıede jappaı tártipsizdik anyqtalǵan edi. Astanada bir dáriger bir kúnde 1 442 naýqasty «qabyldaǵan», al ekinshisi bir aıda 4 832 qabyldaý júrgizgen bolyp shyqqan. Qujattarda qaıtys bolǵan adamdarǵa kórsetilgen medısınalyq qyzmetter, jynysyna sáıkes kelmeıtin júzdegen myń skrınıngter tirkelgen, tipti er adamdarǵa mammografııa jasalǵany kórsetilgen. Sondaı-aq balalarǵa dárilerdi jappaı negizsiz jazý jáne bir adamǵa bir táýlikte myńdaǵan preparat «esepten shyǵarylǵan» jaǵdaılar anyqtalǵan.
MÁMS júıesindegi olqylyqtar: Qaıtys bolǵan adam dáriger qabyldaýynda bolǵan
Osydan keıin Premer-mınıstr Oljas Bektenov anyqtalǵan zańbuzýshylyqtar boıynsha materıaldardy quqyq qorǵaý organdaryna berýdi jáne qarjylyq aǵyndardy tolyq baqylap, júıede tártip ornatý úshin qordy Qarjy mınıstrliginiń qaramaǵyna ótkizýdi tapsyrdy.
20 qańtarda Prezıdent Qasym-Jomart Toqaev Mindetti áleýmettik medısınalyq saqtandyrý qorynyń (MÁMS) Qarjy mınıstrliginiń qaramaǵyna berilýi týraly Premer-mınıstrdiń sheshimin qoldady.
Mindetti medısınalyq saqtandyrý qory nege Qarjy mınıstrligine berildi?
Memleket basshysynyń aıtýynsha, qorda «kóptegen zańbuzýshylyqtar men asyra paıdalanýlar», sonyń ishinde «qarapaıym qosyp jazý men memlekettik qarajatty asa iri kólemde jymqyrý maqsatynda qujattardy óreskel qoldan jasaý faktileri» anyqtalǵan.
«El ekonomıkasynyń sapaly ósýi men ınfraqurylymdyq jobalardy iske asyrýǵa, densaýlyq saqtaýdy damytýǵa búkil el kúsh pen qarajat jumyldyryp jatqanda, áleýmettik salaǵa bólinetin orasan zor qarjy qarapaıym túrde talan-tarajǵa salynyp jatyr», degen edi Prezıdent.
Aıta keteıik, 2024-2025 jyldary tek densaýlyq saqtaý salasyn damytýǵa memleket 7,8 trln teńge bólgen.
