Keshe Astana qalasynyń janyndaǵy 68665-áskerı bóliminde baspasóz qyzmetkerleriniń tól merekesine arnalǵan is-shara jáne Uly Jeńistiń 70 jyldyǵyna oraı, Qorǵanys mınıstrligi uıymdastyrǵan «Máńgi esimizde» atty respýblıkalyq shyǵarmashylyq baıqaýdyń jeńimpazdaryn marapattaý rásimi bolyp ótti.
Saltanatty sharany elimizdiń Qorǵanys mınıstriniń orynbasary, general-maıor Talǵat Muhtarov ashyp, jýrnalısterdi kásibı merekesimen quttyqtap, respýblıkalyq baıqaýdyń jeńimpazdaryna dıplomdar men baǵaly syılyqtar tapsyrdy. Uıymdastyrý komıtetine Qazaqstannyń barlyq óńirlerinen shyǵarmashylyq baıqaýǵa 70 ótinim kelip túsken eken. Baıqaýǵa respýblıkalyq gazet, radıo, televıdenıe jáne aqparattyq agenttikterdiń jýrnalısteriniń qolynan shyqqan týyndylar qatystyryldy. Atap aıtqanda, Uly Otan soǵysynyń 70 jyldyǵyna baılanysty jazylǵan ekinshi dúnıejúzilik soǵystyń tarıhyna qatysty tyń derekter, maıdangerler men tyl eńbekkerleriniń janqııarlyq erlik shejiresi, urys alańynda qaza bolǵandardy izdeý týraly materıaldar saralandy. Memlekettik jáne orys tilderinde kelip túsken shyǵarmalardyń jeńimpazdary 5 nomınasııa boıynsha anyqtaldy.
Sóıtip, «Baspasóz basylymdaryndaǵy úzdik shyǵarma» nomınasııasy boıynsha respýblıkalyq «Egemen Qazaqstan» gazetiniń sholýshysy Jylqybaı Jaǵyparuly jáne «Ekibastuz jarshysy» gazetiniń jýrnalısi Qanat Aldabaev jeńimpaz dep tanyldy. «Úzdik telesıýjet/telebaǵdarlama» nomınasııasy boıynsha «24.kz» telearnasynyń jýrnalısi Jasyn Birkenov pen «Mır» telearnasynyń jýrnalısi Tatıana Jıgýnova, «Úzdik radıosıýjet/radıobaǵdarlama» nomınasııasy boıynsha «Qazaq radıosynyń» tilshisi Mádına Ishanova jáne «Tengrı FM» radıosynyń tilshisi Irına Lelıavskaıa jeńip shyqty. «Internet-basylymdardaǵy úzdik jarııalanym» nomınasııasynda «Kazınform» aqparat agenttiginiń jýrnalısi Murat Jakeev pen «Tengrinews.kz» ınternet-portalynyń jýrnalısi Batyr Qazybaev, al «Úzdik fotoocherk/fotoreportaj» nomınasııasy boıynsha «Kazahstanskaıa pravda» gazetiniń fototilshisi Iýrıı Bekker jeńimpaz atandy.
Sonymen birge, «Máńgi esimizde» respýblıkalyq shyǵarmashylyq baıqaýynyń qorytyndysyn shyǵarý komıssııasy azamattyq belsendiligi úshin jeke shyǵarmalarǵa arnaýly nomınasııa taǵaıyndady. Osy nomınasııa boıynsha Qorǵanys mınıstriniń arnaıy dıplomdarymen jáne baǵaly syılyqtarymen «Egemen Qazaqstan» gazetiniń ardager jýrnalısi Erjuman Smaıyl, Aqtóbe oblystyq gazetiniń tilshisi О́temis Ákimov, «24.kz» telearnasynyń jýrnalısi Dmıtrıı Oleınıkov jáne «Qazaqstan» telearnasynyń jýrnalısi Ernur Nurǵalıev marapattaldy.
68665-áskerı bóliminde ótken saltanatty rásim Qorǵanys mınıstrligi Ortalyq ansambli ártisteriniń merekelik konsertine ulasty. Sonymen birge, merekelik sharaǵa jınalǵan jýrnalıster dala ashanasynda sarbazdar dastarqanynan dám tátti.
«Egemen-aqparat».
