Foto: adyrna.kz
Sarapshynyń pikirinshe, Konstıtýsııa joǵary zań kúshi aktisi retinde osyndaı sezimtal salada keńeıtilgen túsindirýlerge jol bermeýi tıis. Másele Konstıtýsııada bekitilgen zaıyrlylyq qaǵıdatyn anaǵurlym naqty jáne aıqyn quqyqtyq resimdeý turǵysynda bolyp otyr.
«Biz dinniń memleketten bóliný qaǵıdatyn tikeleı bekitý – bul din ustanýshylardyń quqyqtaryn shekteý emes, kerisinshe, bılik tarapynan olarǵa teń kózqarasty qamtamasyz etýdiń quqyqtyq kepili ekenin túsinýimiz qajet. Kópkonfessııaly qoǵamda memleket beıtarap tóreshi retinde áreket etýge mindetti. Meniń sýdıalyq tájirıbem rastaǵandaı, memlekettik apparat pen dinı dogmalar arasyndaǵy naqty arajik qana azamattyq kelisim men qoǵamdyq turaqtylyqty saqtaýǵa múmkindik beredi. Osy qaǵıdatty bekite otyryp, biz qoǵamǵa aıqyn belgi beremiz: zań barshaǵa ortaq, al memlekettik sheshimder azamattardyń dinı ustanymdaryna qaramastan, tek olardyń utymdy múddeleri negizinde qabyldanady», dedi Serik Aqylbaı.
Atalǵan usynystyń qoǵamdyq mańyzdylyǵy týraly aıta kele, ol qoǵamdyq kelisim men quqyqtyq turaqtylyqty nyǵaıtý qajettiligine negizdelgenin atap ótti. Dindi memleketten bólý qaǵıdatyn Konstıtýsııalyq bekitý memleket málimdegen baǵyttyń qısyndy ári dáıekti damýy bolar edi.
«Memleket basshysy el aldynda sóılegen sózderinde memlekettiń zaıyrly sıpaty memlekettiliktiń irgeli qaǵıdaty ekenin birneshe ret atap ótti. Atap aıtqanda, Ulttyq quryltaıdyń ótken otyrysynda Memleket basshysy elimizdiń zaıyrly sıpatyn aıqyndaıtyn normalardy saqtaý jáne kúsheıtý qajettigin erekshe kórsetti. Bul ustanym zaıyrlylyqtyń jaı ǵana formaldy belgi emes, turaqty damýdyń, qoǵamdyq birliktiń jáne zań aldynda barshanyń teńdiginiń mańyzdy negizi ekenin aıǵaqtaıdy», dep túıindedi ol.
Serik Aqylbaı osy turǵyda halyqaralyq tájirıbeden kórneki mysaldar keltirdi. Búginde birqatar zaıyrly memleketterde dindi memleketten bólý qaǵıdasy tikeleı Konstıtýsııada bekitilgen. Olardyń qatarynda Germanııa Federatıvtik Respýblıkasy, Túrkııa Respýblıkasy, Qyrǵyz Respýblıkasy jáne basqa da elder bar.
