Medısınalyq ortalyqtyń málimetinshe, jańa qural-jabdyqtar ortalyqtyń óz qarajaty jáne 2023-2027 jyldarǵa arnalǵan onkologııalyq aýrýlarmen kúres jónindegi keshendi jospar aıasynda respýblıkalyq bıýdjet esebinen satyp alynǵan. Atalǵan joba aıasynda klınıkalyq zerthanalarǵa, emhanalyq bólimge, hırýrgııa, anestezıologııa, reanımasııa jáne qarqyndy terapııa bólimshelerine, sondaı-aq, basqa da qurylymdyq bólimderge shamamen 50 túrli medısınalyq qural-jabdyqpen tolyǵyp otyr. Bul keshendi tásil onkologııalyq aýrýlardy dıagnostıkalaý men emdeýdiń tolyq sıklin zamanaýı medısınalyq tehnologııalar arqyly joǵary deńgeıde qamtamasyz etýge múmkindik beredi.
Jýyrda oblys ákimi Berik Ýálı medısınalyq nysandaǵy joǵary tehnologııaly zamanaýı qondyrǵylardyń jumysymen tanysty. Iаdrolyq medısına jáne onkologııa ortalyǵynyń dırektory Saıat Tańatarov aımaq basshysyna zamanaýı jabdyqtardyń múmkindikteri jáne ortalyqtyń qyzmeti, aldaǵy damý josparlary týraly baıandady.
Jaqynda iske qosýdy josparlap otyrǵan jabdyqtardyń qatarynda sáýlelik dıagnostıka bóliminde ornatylǵan «Revolution Maxima» kompıýterlik tomografy jáne «GIOTTO CLASS 40000» sıfrlyq rentgendik mammografııalyq apparaty bar.
«Bul júıelerdi iske qosý ortalyqtyń dıagnostıkalyq múmkindikterin edáýir keńeıtip, aýrýlardy aldyn ala anyqtaýǵa múmkindik beredi. «Revolution Maxima» kompıýterlik tomografy joǵary skanerleý jyldamdyǵymen, keskin sapasynyń aıqyndyǵymen jáne sáýlelik júktemeniń tómendigimen erekshelenedi. «GIOTTO CLASS 40000» sıfrlyq mammografııalyq apparaty sút bezderin joǵary dáldikpen zertteýge arnalǵan jáne dıagnostıka salasyndaǵy zamanaýı halyqaralyq standarttarǵa sáıkes keledi», deıdi bas dáriger.
Ortalyqtyń negizgi ǵımaraty 1978 jyly salynypty. Quramynda 85 tósek-orynǵa arnalǵan stasıonar jáne eki qosalqy ǵımarat bar. Sonymen qatar emhana, radıologııalyq ortalyq jáne radıologııa bólimi jumys isteıdi. Qazir ortalyqta 575 adam eńbek etedi, ol oblystyń 600 myńnan astam turǵynyna qyzmet kórsetedi eken.
О́ńir basshysy jańa medısınalyq qondyrǵylardyń jumysyn kórip, ortalyq qyzmetkerlerimen pikirlesti.
«Iаdrolyq medısına jáne onkologııa ortalyǵy – oblystaǵy eń iri medısınalyq mekemelerdiń biri. Ornatylǵan jańa zamanaýı jabdyqtar medısınalyq qyzmettiń sapasyn arttyrýǵa múmkindik beredi. Mundaı joǵary tehnologııalyq qondyrǵylar dárigerler úshin de, emdelýshiler úshin de asa qajet. Olar aýrýlardy erte kezeńde anyqtaýǵa, dál dıagnoz qoıýǵa jáne tıimdi em júrgizýge jol ashady», dedi oblys ákimi.
Oblystyq densaýlyq basqarmasynyń dereginshe, jalpy 2025 jyly óńirdegi densaýlyq saqtaý salasynyń materıaldyq-tehnıkalyq bazasyn jańǵyrtýǵa 6 jarym mıllıard teńgeden astam qarjy bólindi. 2026-2028 jyldar aralyǵynda stasıonarlyq jáne ambýlatorııalyq-emhanalyq kómek kórsetetin uıymdar úshin 481 medısınalyq tehnıka satyp alý josparlanǵan. Bul medısınalyq tehnıkamen qamtylý deńgeıin 95 paıyzǵa deıin jetkizýge, tozý deńgeıin 30 paıyzǵa deıin tómendetýge múmkindik beredi.
