«Quqyq qorǵaý júıesin sıfrlandyrý úderisi birkelki emes, ıaǵnı ár jerde árqalaı. Ár mekeme sıfrlyq júıesin óz betimen damytyp jatyr. Birtutas júıe joq. Mysaly, keıbir organdar sıfrlyq tásilderdi utymdy qoldanyp jumys isteıdi. Al keıbiri durys amal-tásil taba almaı, qyrýar qarjy jumsap júr. Bul, basqa sózben aıtqanda, naǵyz jymqyrý. Sondyqtan qarajatty orynsyz jumsap, jańa dúnıe jasaýdyń qajeti joq. Úkimetke qoldanystaǵy barlyq sıfrlyq sheshimderdi saralap, tekserip, olardyń tıimdiligin arttyrýdy tapsyramyn. Kúshtik qurylymdarǵa arnalǵan túsinikti qurylymy bar jáne tehnologııalyq standarttary birkelki biryńǵaı sıfrlyq ekojúıe jasalýǵa tıis», dep atap ótti Memleket basshysy.
Prezıdent azamattardyń derbes derekterin qorǵaý qajet ekenin de aıtty.
«Aqparattyq keńistikte azamattardyń derbes derekteri jarııalanyp ketkeni týraly habar jıi shyǵyp jatady. Derbes derekterdi barynsha qorǵaý úshin bul jumyspen júıeli túrde aınalysý kerek», dedi Prezıdent.
Sonymen qatar Qasym-Jomart Toqaev kıberqylmyspen kúres tásilderin túbegeıli qaıta qaraý qajet ekenin aıtty.
«Álemde kıberqylmys órship barady. Jyl saıyn myńdaǵan azamatymyz sonyń qurbany bolyp jatyr. Qazir ınternettegi alaıaqtyq qylmystardyń besten biri ǵana ashylady. Bul – óte tómen kórsetkish. Kıberqylmyspen kúres tásilderin túbegeıli qaıta qaraý qajet. Sıfrlyq qaterge tótep berý úshin quqyq qorǵaý organdary bir qadam alda júrýge tıis. Ozyq oılap, artta qalmaýdyń amalyn tabý qajet», dedi el Prezıdenti.
Aıta keteıik, búgin 26 qańtarda Memleket basshysy Bas prokýratýrada jıyn ótkizdi.
Buǵan deıin Prezıdent qysqy Olımpıadaǵa qatysatyn ulttyq qurama múshelerine Memlekettik týdy tapsyrǵanyn habarlaǵanbyz.
