Halyqaralyq sahnada usynylǵan konserttik baǵdarlama kórermendi ulttyq ónerdiń tereńine jeteledi. Belgili horeograf, sahna mádenıetinde ózindik qoltańbasy bar Ánel Marabaeva oryndaǵan «Aqqý» bıi náziktik pen sulýlyqtyń rámizindeı áser qaldyrdy. Qozǵalys pen sezimniń úılesimi arqyly kórermen júregine jol tapqan týyndy qazaq bı óneriniń bıik deńgeıin tanytty.
Al opera ánshisi Áıgerim Altynbektiń oryndaýyndaǵy «Alqońyr» áni zaldy terbep, dalanyń keń tynysyn, ulttyq bolmystyń syrly áýezin kári kurlyq tórinde áýeletti. Ánniń ásem ıirimderi men oryndaýshynyń kásibı sheberligi sheteldik tyńdarmandy beıjaı qaldyrmaı, qazaq vokal ónerine degen zor qyzyǵýshylyq týǵyzdy. Sonymen qatar «Temirlan & Yernat» toby oryndaǵan «Alem» kúıi dástúrli kúı ónerin zamanaýı stılmen sabaqtastyryp, konsertke erekshe serpin berdi.
«Túrki aptalyǵy» Túrki memleketteri uıymynyń (TMU) bastamasymen ótkizilip, uıymǵa múshe elderdiń mádenı-gýmanıtarlyq yntymaqtastyǵyn tereńdete tústi. Apta boıy uıymdastyrylǵan konsertter men mádenı baǵdarlamalar arqyly túrki halyqtarynyń ortaq tarıhy, baı mýzykalyq murasy men bı óneri keńinen nasıhattaldy. Aptalyq sheńberinde ótken gala-konsertke Ázerbaıjan, Qazaqstan, Qyrǵyzstan, Túrkııa, О́zbekstan elderiniń shyǵarmashylyq ujymdary qatysyp, ár halyqtyń ózindik bolmysyn, ónerdegi ereksheligin kórsetti. Ortaq sahnada toǵysqan bul óner merekesi túrki jurtynyń birligi men mádenı jaqyndyǵyn aıqyn ańǵartyp, Vena jurtshylyǵy men qala qonaqtaryna umytylmas rýhanı áser syılady.
