Foto: nitec.kz
Jańa servıs turǵyn úı jyljymaıtyn múlkin jáne kórshiler aldyndaǵy jaýapkershilikti tolyqtaı onlaın formatta saqtandyrýǵa múmkindik beredi. Saqtandyrý turmysta jıi kezdesetin negizgi táýekelderdi, sonyń ishinde órt, jarylys jáne sý basý saldarynan keltirilgen zalaldy qamtıdy. Polıs aı saıynǵy jazylý formaty boıynsha rásimdeledi, bul qyzmetti ıkemdi ári qoljetimdi etedi.
«Tumar Home» servısi eGov Mobile qosymshasyna ıntegrasııalanyp, azamattarǵa óz múlkin qorǵaý múmkindigin usynady.
«UAT» AQ basqarma tóraǵasy Daýlet Bekmanovtyń aıtýynsha, saqtandyrýdy rásimdeý týraly sheshim paıdalanýshynyń óz erkinde. Al «UAT» AQ komandasy seriktestermen birlesip servıstiń mobıldi qosymsha ekojúıesine yńǵaıly ári qaýipsiz engizilýin qamtamasyz etti.
Saqtandyrý polısin rásimdeý úshin paıdalanýshy eGov Mobile qosymshasynda avtorızasııadan ótip, «Habarlamalar» – «Habarlandyrýlar» bólimi arqyly «Tumar Home» servısin tańdaıdy. Odan keıin derbes derekterdi óńdeýge kelisim berip, qajetti málimetterdi toltyryp, saqtandyrý jarnasyn tóleıdi.
Bul týraly nitec.kz málimetinshe, saqtandyrýǵa jazylý quny aıyna 1 500 teńge. Tólemderdiń jalpy somasy 500 myń teńgege deıin jetedi. Onyń 250 myń teńgesine deıin múlikke keltirilgen zalaldy óteýge, al taǵy 250 myń teńgesine deıin úshinshi tulǵalarǵa keltirilgen zııandy óteýge baǵyttalady.
Bul ónimdi iske asyrýǵa Freedom Insurance, Basel jáne Alatau City Garant saqtandyrý kompanııalary qatysady. Tańdalǵan kompanııaǵa qaramastan, saqtandyrý sharttary men polıs quny barlyq paıdalanýshy úshin birdeı.
«Biz saqtandyrýdy sıfrlyq yńǵaılylyqtyń jańa deńgeıine shyǵarǵanymyzǵa qýanyshtymyz. «Tumar Home» – eń jıi kezdesetin turmystyq táýekelderdi qamtıtyn qarapaıym, qoljetimdi ári tıimdi ónim. eGov Mobile-men ıntegrasııa saqtandyrýdy birneshe qadammen rásimdeýge múmkindik beredi», dedi «Tumar» saqtandyrý brokeri» JShS ókilderi.
Servıs jyljymaıtyn múlikti endi rásimdegen azamattarǵa qoljetimdi. Menshik quqyǵy tirkelgennen keıin paıdalanýshylar eGov Mobile qosymshasynda saqtandyrýdy rásimdeý týraly habarlandyrý alady. Polıs birneshe mınýtta, tolyqtaı sıfrlyq formatta rásimdeledi. Bul qaǵaz qujattardan bas tartyp, prosestiń qarapaıym ári qaýipsiz bolýyn qamtamasyz etedi. Servıs memlekettik elektrondyq qyzmetter ekojúıesine biriktirilgendikten, azamattar múliktik jáne ákimshilik máselelerdi bir qosymsha arqyly qatar sheshe alady.
