Foto: Aqorda
«Biz elimizdi damytýǵa arnalǵan qarajatty tıimdi jumsaýdyń amalyn izdep qınalamyz. Biraq soǵan qaramastan áleýmettik salaǵa bólingen trıllıondaǵan teńge qarjyny jymqyratyn alaıaqtar bar, tipti, az emes dep aıtýǵa bolady. Bul – múlde aqylǵa syımaıtyn jaǵdaı. Mundaı keseldi túp-tamyrymen joıý kerek. Qarjyny krıptovalıýtaǵa aınaldyryp, shetelge shyǵarý jaǵdaılary da azaımaı tur, ondaı zańsyzdyqqa tosqaýyl qoıý qajet. Mundaı teris ahýal ekonomıkaǵa orasan zor zardabyn tıgizip jatyr. Túptep kelgende, kóleńkeli ekonomıkamen úzildi-kesildi kúresý kerek. Bul da – óte ózekti, asa mańyzdy mindet. Qarjylyq monıtorıng qyzmetiniń aldynda turǵan mindet belgili: bul – memleket qarjysynyń tek qana el ıgiligine jumsalýyn qadaǵalaý. Osy mańyzdy mindettiń sapaly iske asýy sizderdiń qyzmetterińizge tikeleı baılanysty», dedi Memleket basshysy.
Sondaı-aq Qasym-Jomart Toqaev memleket agenttik qyzmetkerleriniń tıimdi ári alańsyz jumys isteýi úshin qajetti jaǵdaı jasap jatqanyn jetkizdi.
«Kadrlyq quram ulǵaıyp, nyǵaıa tústi, materıaldyq-tehnıkalyq qor jaqsardy. Jalaqy kóterildi, baspana berildi, jalpy, kóptegen áleýmettik másele sheshimin tapty. Kerek bolsa, agenttik júıesine úsh general shenin qosýǵa bolady dep oılaımyn. Bul sheshim oblystarda jumys istep júrgen naǵyz úzdik qyzmetkerlerdiń mártebesin kóterýge múmkindik beredi. Endi tek bilek sybana jumys isteý kerek», dedi Prezıdent.
Memleket basshysy Qarjylyq monıtorıng agenttiginde jıyn ótkizdi
Memleket basshysy saladaǵy jetistikterge de toqtaldy.
«Halyqaralyq yntymaqtastyq nyǵaıyp keledi. Elimiz Financial Action Task Force uıymynyń tekserisinen sátti ótti. Qazaqstan 2023 jyldan beri «Egmont» tobynyń qarjylyq barlaý birlestiginde Eýrazııa aımaǵynyń múddesin qorǵaıdy. 20 iri krıptobırjamen syndarly seriktestik ornatyldy. Elimizde blokcheın-taldaýmen aınalysatyn «Krıpton» arnaıy qurylymdyq bólimshesi ashyldy. Bul – Ortalyq Azııa elderinde qurylǵan osyndaı alǵashqy bólimshe. Byltyr qarjyny qolma-qol aqshaǵa aınaldyratyn 200-ge jýyq jalǵan kompanııa áshkerelendi. Olardyń zańsyz aınalymdaǵy qarajaty 500 mıllıard teńgeden asady. Seksennen astam qylmystyq top quryqtaldy. 100-den astam qarjy pıramıdasy joıyldy. Munyń bári elimizdiń ekonomıkalyq qaýipsizdigin nyǵaıta túskeni sózsiz», dedi Prezıdent.
Eske salaıyq, búgin Prezıdent álemdegi eń úzdik pedagogterdiń qataryna engen almatylyq muǵalimdi quttyqtady.
