Bul týraly advokat Aıanhan Omarov óziniń Telegram-arnasynda jazdy. Onyń aıtýynsha, is stalkıng faktisi boıynsha qozǵalǵan.
«Nuraıdyń isi boıynsha Shymkent qalasy Polısııa departamenti Qylmystyq kodekstiń 115-1-baby (stalkıng) boıynsha qylmystyq is tirkedi. Jábirlenýshini júıeli túrde qýdalaý faktilerine ádil quqyqtyq baǵa beriledi dep úmittenemin. Istiń tergelý barysyn qadaǵalap otyrmyz. Tergeýdiń obektıvti jáne tolyq júrgizilýin, kináli tulǵanyń qatań túrde jazaǵa tartylýyn talap etemiz», dep jazdy ol.
Eske sala keteıik, Nuraı Serikbaı 11 qańtar kúni Shymkentte pyshaq jaraqattarynan qaza tapty. Áleýmettik jelide taraǵan beınejazbalarda qyzdyń qashýǵa tyrysqany, keıin qarsylyq kórsetkeni, al kúdiktiniń ony uryp, pyshaq suqqany kórinedi. Odan keıin kúdikti oqıǵa ornynan qashyp ketken.
Marqum Nuraı Serikbaıdyń aǵasynyń aıtýynsha, kúdikti uzaq ýaqyt boıy onyń qaryndasyn ańdyp, stalkıngpen aınalysqan.
13 qańtar kúni polısııa 28 jastaǵy kúdiktini qaladan 10 shaqyrym jerde ustady. Er adam ýaqytsha ustaý ızolıatoryna qamaldy.
Keıin Shymkent qalalyq polısııa departamenti kúdiktiniń qamaýǵa alynǵanyn habarlady.
Prezıdent Qasym-Jomart Toqaev Ulttyq quryltaıdyń V otyrysynda qyzdyń qazasyna baılanysty Shymkent polısııa departamentinde tekserý júrgiziletinin aıtty. Sol kúni Shymkent polısııa departamentiniń bastyǵy Nurlan Almasbekov, onyń birinshi orynbasary jáne birneshe qyzmetker laýazymdarynan bosatyldy. Sondaı-aq iske nemquraıdy qaraǵan polıseılerge qylmystyq is qozǵaldy.
