Desant barlaýshy bolý kez kelgen áskerı qyzmetshiniń qolynan kele bermeıdi. Aldymen qatań irikteý júrgiziledi. Úmitkerdiń densaýlyǵy, fızıkalyq daıyndyǵy ǵana emes, psıhologııalyq saýlyǵy da basty nazarǵa alynady. Sebebi barlaýshy kóbine qaýipti ortada stresske tózimdi, oqshaý jaǵdaıda jedel áreket etýge tıis. Jaýyngerdiń derbes sheshim qabyldaı bilýi de eskeriledi.
Daıarlyqtyń negizgi bóligi fızıkalyq jattyǵýlarǵa arnalǵan. Uzaq marshtar, aýyr jabdyqpen qozǵalý, kedergiler jolaǵynan ótý – kúndelikti mashyq. Bul barlaýshynyń tózimdiligin shyńdap qana qoımaı, kez kelgen jaǵdaıda kedergilerdi eńserip, tapsyrmany oryndaýǵa beıimdeıdi.
Sonymen qatar taktıkalyq sabaqtarda jasyryn qozǵalý, qarsylas aýmaǵynda baqylaý júrgizý, barlaý derekterin jınaý men jetkizý tásilderi úıretiledi. О́ıtkeni betaldy shabýyl jasamas buryn strategııalyq turǵyda jaýdyń kúshin anyqtap, tehnıkalyq áleýetin baǵalaý kerek. Sondyqtan jattyǵýlar kúndiz-túni, ártúrli aýa raıynda ótedi.
Qazir Qonaev qalasy mańyndaǵy Desanttyq-shabýyldaý áskerleriniń oqý-jattyǵý ortalyǵynda Almaty, Qonaev, Jetisý garnızondarynyń barlaý bólimshelerine josparly dalalyq jıyn ótip jatyr. Bul oqý-jattyǵý ortalyǵy merzimdi qyzmettegi jáne kelisimshart boıynsha áskerı qyzmetshilerdi keshendi daıarlaýǵa arnalǵan zamanaýı ınfraqurylymmen tolyq jabdyqtalǵan. Sabaqtar qaýipsizdik talaptaryna saı, urys jaǵdaıyna barynsha beıimdelip uıymdastyrylǵan.
«Qalqan» laqap atyn ıelengen maıordyń aıtýynsha, dalalyq joryqtar jaýyngerlik ári taktıkalyq-arnaıy daıyndyq daǵdylaryn pysyqtaýǵa, bólimshe quramynda áreket etýge, eń mańyzdysy – jattyǵýlarda olardyń tózimdiligi, eptiligi men reaksııa jyldamdyǵy damytýǵa arnalǵan.
Jıyn aıasynda desantshylar bazalyq lagerlerdi ornalastyrý erejesin meńgerip, baılanys quraldarynyń ár túrin, mınalaý-jarý isiniń elementterin, taktıkalyq medısına men ushqyshsyz ushatyn qurylǵylardy basqarýdy úırenip jatyr. Odan bólek, avtomat, tapansha, pýlemet pen Dragýnov mergendik vıntovkasynan oq atý jattyǵýlary ótkiziledi.
Áskerı qyzmetshiler qaraýyldardy jasyryn túrde joıý tásilderin, pyshaq pen saper kúregin laqtyrý ádisterin de pysyqtaıdy. Barlaý bólimsheleri búrkemelengen baqylaý oryndarynan qadaǵalaý júrgizýge, top quramynda áreket etýge, shartty qarsylasty kúshpen ustaýǵa, jergilikti jerdi baǵdarlaýǵa, transheıa men oıly-qyrly jerde urys júrgizýge jattyǵady.
Búginde jeke quramnyń taǵylymdamasy men kásibı ósýine erekshe nazar aýdarylyp keledi. Kúzde áskerge alynǵan sarbazdar arasynda úzdik nátıjeler kórsetken áskerı qyzmetshiler de bar. Solardyń biri – Nógerbek Tátimbek.
Ol nebári úsh aı qyzmet etkennen keıin kishi serjant ataǵyn alyp, bólimshe komandıri bolyp taǵaıyndaldy. Sarbazdyń sózinshe, dalalyq jaǵdaıdaǵy sabaqtar barlaýshy qyzmetiniń mánin tereń túsinýge múmkindik berip, jaýapkershilik pen jaýyngerlik rýhty qalyptastyrady.
«Ańdyp basyp, kez kelgen baǵytta áreket etýge ázir bolý barlaýshylardyń maqsaty. Al ony iske asyrý úshin biz túrli synaqtan ótemiz. Kedergilerden ótpes buryn psıhologııalyq turǵyda daıyn bolýymyz mindetti. Jergilikti aýmaqtyń jaǵdaıyna qaraı áreket etý, sana-sezimniń ashyqtyǵyn talap etedi. Dalalyq jıyndar bólimshelerdiń jaýyngerlik ázirligin arttyrýǵa, jeke quramnyń moraldyq-psıhologııalyq ahýalyn nyǵaıtý men barlaýshylardyń kásibı quzyretin shyńdaı túsedi», deıdi ol.
Kishi serjant Tátimbek joǵary oqý ornyn «keden isi» mamandyǵy boıynsha támamdaǵan. Aǵasynyń keńesimen jaýynger Desanttyq-shabýyldaý áskerlerinde qyzmet etýdi tańdaǵan. Áskerı qyzmetshi kıokýshınkaı karateden qara belbeý ıegeri ári 2024 jylǵy álem chempıony. Bolashaqta kelisimshart negizinde qyzmetin jalǵastyrýdy josparlap otyr.
