Foto: Ashyq derekkóz
Zańdaǵy negizgi jańashyldyqtardyń biri – retteýdiń ıkemdi modeline kóshý. Buǵan deıin zań deńgeıinde shamadan tys egjeı-tegjeıli sıpattalǵan birqatar normalar Úkimet qaýlylary deńgeıine aýystyrylady. Bul basqarý úderisteriniń jedeldigin arttyryp, ózgermeli jaǵdaılarǵa tez beıimdelýge múmkindik beredi.
Qarý aınalymy salasynda azamattyq jáne qyzmettik qarý ıelerine qoıylatyn talaptar kúsheıtildi. Atap aıtqanda, baqylaý úshin mindetti túrde oq atý rásimi engizilip, qyzmeti ýaqytsha toqtatylǵan kúzet uıymdarynyń qarýyn arnaıy saqtaý oryndaryna tapsyrý tártibi naqtylandy. Bul qarýdyń zańsyz aınalymynyń aldyn alýǵa baǵyttalǵan.
Kúzet qyzmeti salasynda da birqatar jańa talap kózdelgen. Endi jeke kúzet uıymdary úshin mindetti eseptilik engiziledi, qyzmetin toqtatý jáne qaıta bastaý habarlama tártibimen júzege asady. Sondaı-aq jeke kúzet qurylymdarynyń basshylyq quramyna biryńǵaı talaptar belgilenedi.
Zańnamalyq deńgeıde alǵash ret áskerı quramdaǵy temirjol kúzetiniń mártebesi aıqyndaldy. Olarǵa tranzıttik temirjol tasymaldaryna tartylǵan termınaldar aýmaǵyndaǵy júk pen nysandardy kúzetý qyzmetin kórsetý quqyǵy berilip otyr. Bul strategııalyq mańyzy bar ınfraqurylym qaýipsizdigin kúsheıtýge baǵyttalǵan.
Sonymen birge kúshtik qurylym qyzmetkerlerine arnalǵan turǵyn úı tólemderin retteý tártibi jetildirildi. Bul ókilettik Úkimetke berilip, al tólem alýshylar úshin turǵyn úıdi jalǵa alý sharttaryn mindetti memlekettik tirkeý talaby alynyp tastaldy. Mundaı qadam áleýmettik qoldaýdy alý rásimderin jeńildetýge múmkindik beredi.
Jalpy, qabyldanǵan zań qaýipsizdik salasyndaǵy baqylaýdy júıelep, quqyqtyq retteýdiń tıimdiligin arttyrýǵa jáne azamattardyń qorǵalý deńgeıin kúsheıtýge baǵyttalǵan.
