Senator Konstıtýsııalyq qurylystyń negizderine, Quryltaı men Halyq Keńesiniń qyzmetine baılanysty máselelerge toqtaldy.
«QR jańa Konstıtýsııasy jobasynyń 52-babyna sáıkes Qazaqstan Respýblıkasynyń Quryltaıy zańnamalyq bılikti júzege asyratyn Qazaqstan Respýblıkasynyń joǵary ókildi organy bolyp tabylady. Quryltaıdyń ókilettikteri, qyzmet tártibi, depýtattardyń quqyqtyq jaǵdaıy Konstıtýsııalyq zańmen aıqyndalady. Bir palataly Parlamentke kóshý sheńberinde zań shyǵarýshy organnyń ókilettikteri jete qaıta qaralyp, Quryltaıǵa qatysty keń aýqymdy túzetýler jobasyna ókilettikterdi keńeıtý jáne tejemeler men teńestirmeler júıesin kúsheıtý engizildi. Engizilgen ózgerister men tolyqtyrýlar azamattarymyzdyń quqyqtary men múddelerin qorǵaý kepildikterin keńeıtýdi qamtamasyz etedi», dep aıtty Konstıtýsııalyq reforma jónindegi komıssııa múshesi.
Sondaı-aq ol Ádiletti Qazaqstandy saıası jańǵyrtý jáne qalyptastyrý baǵyty saıası júıeni jańartýdyń, parlamenttik baqylaýdy kúsheıtýdiń jáne zańnamanyń sapasyn arttyrýdyń tıimdi tetigi bolatynyn atap ótti.
«Usynylǵan normalar Quryltaıdyń jedel, túsinikti jáne qoǵam úshin ashyq zań shyǵarý prosesi bolýyna yqpal etedi. Konstıtýsııalyq qaǵıdattardy nyǵaıtý, sondaı-aq bılik pen qoǵam arasynda qalyptasqan ózara qarym-qatynas dástúrlerin odan ári nyǵaıtý úshin jańa ınstıtýt – Qazaqstan Halyq keńesin qurý usynyldy. Halyq keńesin qurý mártebesi men tártibi Konstıtýsııanyń jekelegen bóliginde jáne arnaıy Konstıtýsııalyq zańda bekitiledi. Usynylǵan ózgerister men tolyqtyrýlar eldiń konstıtýsııalyq qundylyqtary men onyń qaǵıdattaryn qundy mazmunmen tolyqtyryp, eldiń jańa tarıhı kezeńge ótýine negiz bolatyny sózsiz», dep túıindedi.
Erlan Qarın: Jańa Konstıtýsııa Qazaqstannyń kemeldengen memlekettigin kórsetedi
