Sýret: gazeta.uz
Joǵarǵy sottyń barlyq sýdıalaryn saılaý quzyreti endi joǵary ókildi organ depýtattaryna berilmek. «Bul – bılik tarmaqtary arasyndaǵy tejemelik tepe-teńdik júıesin nyǵaıtý jáne ulttyq parlamentarızmdi damytý jolyndaǵy mańyzdy qadam», dedi Prezıdent. Bul ózgeristerden Parlamenttiń bedeli kóterilip, onyń bıligi artady dep oılaımyn. Halyq qalaýlylary osy múmkindikti paıdalanyp, Joǵarǵy sot sýdıalarynyń ádiletti jaqtap, halyq pen memleket múddesi jolynda janashyr úkimge júginetin bolar degen úmittemin.
Aldaǵy ýaqytta saıası partııalardyń belsendiligi kúsheıedi. О́ıtkeni endi Parlamentke depýtattar partııalyq tizimmen saılanady. Endi majorıtarlyq júıe máslıhat depýtattaryn saılaǵanda ǵana saqtalatyn bolypty. Osyǵan baılanysty Prezıdent: «Keıbir partııalar Parlamentpen qatar barlyq deńgeıdegi máslıhattardy proporsıonaldy júıemen jasaqtaýdy usynǵanyn bilemin. Biraq aımaqtarda majorıtarlyq júıeni saqtap qalý kerek dep oılaımyn. Elimizdiń óńirlerinde jergilikti azamattardyń daýystary, pikirleri jaqsy estilýi qajet. Bul – men úshin aıqyn ustanym», dedi.
Prezıdenttiń Parlamenttegi kvotasyn alyp tastaý týraly pikiri de maǵan unady. Shyn máninde, Parlamentte «tańdaýly tulǵalardyń» bolǵany kimge kerek. Barlyq depýtattardyń quqy men qaqy birdeı bolýy qajet. Memleket basshysy bul týraly: «Parlament eshkimniń qamqorlyǵyna, qadaǵalaýyna muqtaj emes ekenine senimdimin. Depýtattardyń ishinde arnaıy taǵaıyndalǵan «tańdaýly tulǵalar» bolmaýy kerek. Olar bárine birdeı, ortaq tártippen saılanýǵa tıis», dedi.
Parlamenttegi Qazaqstan halqy Assambleıasynyń arnaıy kvotasynyń alyp tastalatyndyǵy da maǵan unady. О́ıtkeni osynyń ózi halyq arasynda túsinispeýshilik týdyratyn. Jurttyń bári bir saılaýshylardyń qalaýymen saılansa, Assambleıanyń kvotasyna engen depýtattar ekinshi daýys berý arqyly, QHA músheleriniń ǵana qalaýymen saılanatyn edi. Endi ádilettilik ornaıdy.
Ásııa BEKTURǴANOVA,
dosent
