Arqadaǵy tamalardyń sońǵy bolysy, bıi bolǵan Súıindikuly Áliniń jubaıy Aǵymjannan qalǵan aǵash tabaq kóneniń kózindeı. Iesi Qazyken aǵamyz ony jádiger etip saqtap qana qoımaı, syıly kisi kelse, sol aǵash tabaqtan dám tatyrady.
«Qansha degenmen ǵasyrdan astam saqtalǵan aǵash tabaqtyń óz kúıin joǵaltpaýy, baǵa jetpes qundylyǵy, qasıeti, tańdap jasalǵan aǵashynyń myqtylyǵynan shyǵar. Negizi, pishini Abaı dám ishken tabaqqa kelińkireıdi. Bizdiń tabaqtyń ereksheligi – óńin bermeıdi. Jáne bezi óte kóp. Soǵan qaraǵanda eń qatty aǵashtan oıylǵan.
Ákem Kópbosyn – Áliden qalǵan jalǵyz tuıaq. Bul jádigerdi anam Nurzıpa kóziniń qarashyǵyndaı saqtap, bizge amanattady», deıdi Qazyken Kópbosynuly.
Aǵymjan ájeıdi tóńirek «sheshe» dep atap ketken. Dastarqany kól-kósir, úıinen kisi arylmaıtyn keń kóńildiń ıesi bolypty deıdi kózkórgender. Ázız anadan qalǵan sol tabaqtan minekeı, áýlettiń shópshekteri, nemeneleri dám tatyp júr. Ǵasyrlyq mura degen osy bolsa kerek-ti.
Qazir aýyldaǵy úlken úı Astanaǵa kóshken. Astanadaǵy úlken úıdiń ıesi Qazyken aǵamyzdyń da shańyraǵyna Aǵymjan anamyzdyń aǵyl-tegil dastarqany juǵysty bolǵan. Qazyken ákemiz áýlettegi sábıdiń ózine aǵash tabaqtyń maıyn jaǵyp, aýyz tıgizedi. Onyń syry da bar.
Arǵy atamyz Álekeń kezinde alashordalyqtarmen tyǵyz baılanysta bolypty. Olar talaı ret sol óńirdegi syıly adam bolǵan soń atamyzdyń úıine kep túsedi. Bul tabaqtan qalyń qazaqty oıatqan Mirjaqyp Dýlatuly bastaǵan ulylar, dala danyshpany atanǵan Álkeı Marǵulan sekildi ǵalymdar as ishipti. Ulylar dám tatqan tabaq – bul. Iesi sol sebepti, ulylar qolynyń taby qalǵandyqtan, jaqsylyǵy juǵysty bolsyn dep yrymdaıtyn kórinedi.
Úlken úıdegi aǵamyz aı saıyn aǵash tabaqty tutasymen jylqynyń maıymen maılap otyrady. Osydan-aq, jylqy maıynyń qasıetin baǵamdaı berińiz...
Biz osy tabaqtan et asaýdy ańsaımyz: eń keremeti – ettiń nany birazǵa deıin ystyǵyn joǵaltpaıdy. Budan ishken astyń da dámi uzaq ýaqytqa deıin tańdaıdan ketpeıdi.
Úlken úıge sálem berip qaıtpaǵaly da biraz boldy...
Qaraǵandy oblysy
