Basty baǵdar – syrtqy naryq

Byltyr “Samuryq-Qazyna-Invest”, “QAZIN­TER­TEHSERVIS” JShS-leriniń jáne Fınlıandııanyń “Sampo Rosenlew Ltd”, Polshanyń “Pronar SP.z.o.o.” kompanııalarynyń ókilderi Qyzyljar óńirine kelip, aýyl sharýashylyǵy men kommýnaldyq tehnıkalar shyǵarýǵa arnalǵan birlesken kásiporyn qurýǵa nıet bildirgen bolatyn. Olardyń usynysy aımaq basshysy Erik Sultanovtyń tarapynan qoldaý taýyp, ile-shala boı kótergen “QazTehMash” mashına qurylysy zaýyty» JShS burynǵy shaǵyn lıtrajdy qozǵaltqyshtar kásiporny ǵımaratynda óndiris ornyn jasaqtaýǵa kiristi. Indýstrııalyq-ınnovasııalyq damý memlekettik baǵdarlamasynyń ekinshi besjyldyǵynyń Indýstrııalandyrý kartasyna engizilgen serpindi jobany júzege asyrýǵa 1,9 mıllıard teńge ınvestısııa tartyldy. Qysqa merzimniń ishinde jalpy aýmaǵy 7 myń sharshy metr bolatyn qurastyrý sehy daıyn etildi. Zamanaýı qajetti qondyrǵylar shetelderden jetkizildi. Kombaın qurastyrýǵa tikeleı qatysatyn mamandar Fınlıandııanyń “Sampo Rosenlew Ltd”, Polshanyń “Pronar SP.z.o.o.” kompanııalarynda ozyq tehnologııa boıynsha oqyp, kásibı bilimderin jetildirdi. Innovasııalyq jobanyń birinshi kezeńinde daıyn ból­shekterden kombaındar qurastyra otyryp, otandyq mazmunǵa birtindep kóshý, tolyq qýatynda jumys istegen kezde jylyna 400 kombaın, 500 traktor, 1200 kommýnaldyq tehnıka shyǵarý, 168 jańa jumys ornyn ashý belgilendi. Kredıttiń syıaqy stavkasy “Bıznestiń jol kartasy-2020” memlekettik baǵdar­lamasy aıasynda demeý arqyly qarjylandyryldy. ...Mine, kópten kútken jaǵym­dy habar aýyl eńbekkerlerin eleń etkizdi. Birikken kásiporyn «Qazaqstanda jasalǵan» degen belgimen qurastyryp shyǵarǵan «Pronar Asia» markaly aýyl sharýashylyǵy tehnıkalarynyń alǵashqy legi Qyzyljar aýda­nynyń shabyndyqtarynda synaqtan múdirmeı ótti. Ta­nystyrý rásiminde jınalǵandar nazaryna jemshóp daıyndaıtyn tehnıkalardyń úsh túri usynylyp, tehnıkalyq jáne óndiristik minezdemeleri jaıly «Qaztehmash» mashına qurylysy zaýyty» seriktestiginiń kommer­sııalyq dırektory Qanat Sú­leımenov baıandap berdi. Ol óz só­zinde Elbasy Qazaqstan halqyna Úndeýinde aldymyzǵa DSU be­­­retin artyqshylyqtardy tıimdi paıdalana bilý mindetin qoıǵanyn jetkize kelip, halyq­aralyq uıym erejeleri men qaǵıdattaryna saı talaptar jan-jaqty qamtylǵa­­­nyn málimdedi. Bul oıyn naqty mysaldarmen dáıektedi. Atap aıtqanda, ónim­derdiń sapalylyǵy men qol­jetimdiligi birinshi kezekte eske­rilgen. Shóp shabatyn shalǵy – 2,5 mıllıon, eki rotor­ly jı­naǵysh – 4,2 mıllıon, nyǵyz­daýysh 4 mıllıon teńge turady. Soltústikqazaqstandyq agrarshylardy baǵanyń tómendigi qanaǵattandyrsa, servıstik qyz­met aıasynda qajetti bólshek­ter­men qamtamasyz etý júıesi de qyzyq­tyrdy. Sol sebepti bolar, «Peter­feld-Agro» JShS ózge­lerden buryn qolqa salyp, eki tehnıkany satyp alýǵa birden ýaǵdalasty. – Bizdiń sharýashylyq mal ósirýmen aınalysady. Baǵymdaǵy asyl tuqymdy iri qara maldaryna jemshóp qoryn jasaqtaýda tehnıkalardyń sheteldegiden bir mysqal da kem emestigin ańǵaryp, ári qaraı turaqty baılanys ornatatyn bolyp otyrmyz, – dedi tildeskenimizde sharýa­shylyqtyń basqarýshy dırektory Nurlan Ábdilov. Shóp shabatyn tehnıkalardyń bir artyqshylyǵy, kommýnaldyq qyzmet júıesinde de paıdalanýǵa bolady eken. Oblys ákiminiń orynbasary Vladımır Býbenko ozyq tehnıkalardy tamashalaýshylardy elimizdiń DSU-ǵa kirý jeńisimen quttyqtap, mashına jasaýshylar búgingi tyrnaqaldy ónimderin álemdik saýda zańdylyqtaryna sáıkes qurastyrǵanyn, munyń ózi básekege qabilettilik qarym-qabilettiń arta túsýine yqpal jasaıtynyn, syrtqy naryqqa ıkemdelý, baǵdarlaný jolynda ózara árekettestik jaýapkershiligi nyǵaıatynyn atap ótti. Tusaýkeser rásimde satylymǵa jemshóp taratqysh, tirkemeler, kombaındar sekildi tehnıka túrleri shyǵarylatyny aıtyldy. Jańa tehnıkalardy sýbsıdııalaý jónindegi ótinim Aýyl sharýashylyǵy mınıstrliginde qaralýda. О́mir ESQALI, «Egemen Qazaqstan». Soltústik Qazaqstan oblysy, Qyzyljar aýdany.