Qaýipsizdiktiń ózekti máseleleri qaralǵan halyqaralyq basqosý

24-25 maýsym kúnderi Reseı Federasııasyndaǵy Býrıatııa avtonomııasynyń astanasy – Ýlan-Ýde qalasynda qaýipsizdik máselelerimen aınalysatyn joǵary ókilderdiń VI halyqaralyq kezdesýi bolyp ótti. Sharaǵa elimiz tarapynan Prezıdenttiń kómekshisi – Qazaqstan Respýblıkasy Qaýipsizdik Keńesiniń hatshysy Nurlan Ermekbaev pen Ulttyq qaýipsizdik komıteti tóraǵasynyń orynbasary Nurǵalı Bilisbekov qatysty. Atalǵan aýqymdy halyqaralyq basqosýǵa Reseı tarapy 70-ten astam elden qaýipsizdik keńesteriniń, quqyq qorǵaý jáne arnaıy organdardyń basshylaryn, sondaı-aq, BUU qurylymdaryn qosa alǵanda, túrli halyqaralyq uıymdardyń ókilderin shaqyrdy. Sonymen birge, Azııa, Eýropa jáne Ońtústik Amerıka elderimen qatar, UQShU-ǵa, ShYU-ǵa jáne TMD-ǵa múshe memleketterden aıtarlyqtaı keń kólemde ókilder keldi. Kezdesýdiń basty maqsaty jahandyq ekstremızmge qarsy is-qımyl tanytý salasyndaǵy kópqyrly yntymaqtastyq máselelerin talqylaý boldy. О́ziniń sózinde N.Ermekbaev óńirlik qaýipsizdikke tónip otyrǵan qazirgi zamanǵy syn-qaterler men qaýipterge baǵa berip, terrorızmmen jáne ekstremızmmen kúres boıynsha Qazaqstannyń tıisti organdary tarapynan qabyldanyp jatqan sharalarǵa nazar aýdardy. Taıaý Shyǵys pen Aýǵanstandaǵy  kúrdeli ahýal Eýropanyń, Azııa men Afrıkanyń kóptegen elderi aýmaqtaryna radıkaldy dinı ıdeologııanyń taralýyna yqpal etip otyrǵany erekshe atap kórsetildi. Osyǵan baılanysty terrorızm men ekstremızm kórinisteriniń aldyn alý tetikterin túzý, olardy qarjylandyrý arnalarynyń jolyn kesý jáne ekstremıstik ıdeıalar men kózqarastardan mádenı-aqparattyq keńistikti qorǵaý máseleleri ózekti bola túsedi. Destrýktıvti sıpattaǵy kontentten kıberkeńistikti qorǵaý bóliginde ujymdyq aqparattyq qaýipsizdikti qamtamasyz etý máselesine ekpin túsirildi. Kezdesýler sheńberinde, sondaı-aq, ekologııalyq qaýipsizdikti qamtamasyz etý máseleleri qarastyryldy. Atap aıtqanda, sharaǵa qatysýshylar tarapynan aýyz sý tapshylyǵy, qaýipsizdikti qamtamasyz etý, onyń ishinde, qaýip-qaterli juqpaly aýrýlardyń taralýyna qarsy turý jolymen qaýipsizdikti qamtamasyz etý sııaqty ózekti problemalardy halyqaralyq qoǵamdastyqtyń qazirgiden de góri belsendirek sheshýge umtylýlary  qajettigi atap ótildi. Shara alańdarynda N.Ermekbaevtyń sheteldik áriptesterimen ekijaqty kezdesýleri ótip, olardyń barysynda qaýipsizdik salasyndaǵy ózara is-qımyldyń kókeıkesti máseleleri talqylandy. «Egemen-aqparat».