Onyń aıtýynsha, bul túzetýler jaı ǵana abstraktili quqyqtyq uǵymdardy emes, árbir adamnyń kúndelikti ómirine tikeleı áser etetin mańyzdy dúnıelerdi qamtıdy.
«Másele kúrdeli zań termınderinde emes, árbir adamǵa qandaı quqyqtar týǵannan beri tıesili, qaı quqyqtar tek azamat mártebesimen baılanysty jáne munyń ne úshin mańyzdy ekeninde jatyr», dep atap ótti spıker.
Indıra Áýbákirova Konstıtýsııa jobasynda adam quqyqtary men bostandyqtary azamattyń quqyqtary men mindetterinen naqty ajyratylǵanyn aıtty.
«Quqyqtar men bostandyqtar árbir adamǵa dúnıege kelgen sátten bastap tıesili. Iаǵnı, memleket olardy bermeıdi jáne óz qalaýy boıynsha alyp qoıa almaıdy», dedi ol.
Mundaı quqyqtar absolıýtti ári ajyramas sıpatqa ıe jáne azamattyqqa, ultqa nemese áleýmettik mártebege táýeldi emes. Sondyqtan shetel azamattary men azamattyǵy joq adamdar da bul quqyqtardy Qazaqstan Respýblıkasynyń azamattarymen teń dárejede paıdalana alady.
Konstıtýsııalyq komıssııada jańa Ata Zańdy búkilhalyqtyq referendýmǵa shyǵarý usynyldy
Indıra Áýbákirova 14-baptyń 3-tarmaǵyna erekshe toqtalyp, azamattyń quqyqtary azamattyqpen tikeleı baılanysty ekenin alǵa tartty. Onyń aıtýynsha, mundaı quqyqtar adamnyń memleketpen turaqty quqyqtyq baılanysyna negizdeledi jáne ol ózara quqyqtar men mindetterdiń bolýyn bildiredi. Osy sebepti shetel azamattary men azamattyǵy joq adamdar azamattarǵa ǵana tán jekelegen quqyqtardy tek zańda naqty kórsetilgen jaǵdaılarda ǵana paıdalana alady.
Sondaı-aq ol 14-baptyń 5-tarmaǵyna túsinikteme berip, quqyqtar men bostandyqtardy júzege asyrýdyń shegin belgileý olardy shekteý degen sóz emes ekenin aıtty. Bul shek, kerisinshe, bir adamnyń erkindigi ekinshi adamnyń quqyqtary men bostandyǵyna nuqsan keltirmeýi úshin qajetti tepe-teńdikti saqtaýǵa baǵyttalǵan. Konstıtýsııa jobasynda quqyqtar men bostandyqtardy iske asyrý ózge adamdardyń quqyqtaryn qurmetteý, Konstıtýsııalyq qurylystyń negizderin saqtaý, qoǵamdyq tártipti qamtamasyz etý, halyqtyń densaýlyǵy men qoǵamdyq moraldy qorǵaý talaptarymen tyǵyz baılanysty ekeni aıqyn kórsetilgen.
Konstıtýsııalyq reforma jastarǵa qandaı múmkindikter usynady?
Áýbákirovanyń aıtýynsha, usynylyp otyrǵan ózgerister quqyqtyq aıqyndyqty kúsheıtip, normalardy erkin ári sýbektıvti túrde túsindirý qaýpin azaıtýǵa múmkindik beredi.
