Áben Satybaldıev jáne jary Gúlnar Dýlatova. 1963 jyl
Osy oraıda aıtpaǵymyz, 1999 jyly aqyn Shómishbaı Sarıev tektiniń tuıaǵy Gúlnar apamyzǵa jolyǵyp, kólemdi suhbat júrgizgen eken. Bul jazba «Aqıqat» jýrnalynyń osy jylǵy №9–10 sandarynda jaryq kóripti.
– Gúlnar apaıdyń úıiniń tórgi úlken bólmesine Álıhan Bókeıhan, Ahmet Baıtursynuly jáne óz ákesi Mirjaqyp Dýlatovtyń sýretteriniń qasyna jary Áben Satybaldıevtiń portretin arystarmen birdeı dárgeıde qatar ilip qoıypty, – dep jazady Shómishbaı Naǵashybaıuly. Aqyn bul kóriniske tańdana hám tańyrqaı qarap turyp qalady. Sony sezgen Gúlnar apaı:
– Aınalaıyn qaraǵym, seniń kókeıińde «myna ulylardyń qatarynda Áben Satybaldıev neǵyp qatar tur» degen suraq keptelip turǵan shyǵar. Aıtaıyn. Men óz ǵumyrymda «Gúlnar Dýlatova halyq jaýynyń qyzy» degen sózdi qatygez zamannan, qasiretti qoǵamnan qaımyqpaı qalaı alyp júrsem, Áben de men sııaqty «alashordashyl, halyq jaýynyń kúıeý balasy» degen aýyr taýqymetke qaımyqpaı, qasqaıyp qarsy turǵan adam.
Bul ǵalamda meniń adam balasyna bermes qaıǵy-qasiretimdi túsingen Áben ǵana. Jaryqtyq týmysynan aqynjandy edi. Maǵan arnap jazǵan «Gúlim-aı» óleńinde:
«Zulymdyqtyń kórdiń talaı tepkisin,
О́mirge sen týǵan kúnnen kektisiń,
Qansha ýly sher qatsa da ishińde,
Sezdirmeýshi eń ózgertpesten syrt pishin», –
dep jazǵany bar. Áben qazirgi keıbir «azamatpyn» dep júrgen adamdardyń kóbinen taıaq jedi. Olarmen shekisip jatpaıtyn «Men Dýlatovanyń shoferimin, osyǵan shúkir» dep kóligin qozǵaltyp júre beretin. О́zi «Mirjaqyptyń kúıeý balasy» degen sózdi maqtan tutatyn. Maǵan «Alash azamattary túbinde aqtalady. Sen osy bastan bilgenińdi jaza ber. Bolmasa men sııaqty hatshyń bar, maǵan jazdyr» deıtin edi. Biraq Ábenim atasynyń aqtalǵanyn kóre almady, 1974 jyly 60 jasynda baqılyq boldy, – deıdi.
Áben aǵamyzdyń azamattyǵy týraly jazýshy Muhtar Maǵaýın: «Halyq jaýynyń» qyzyn jar qylyp alý úshin de júrektiń ájeptáýir túgi bolý kerek. Osy oraıda, Áben Satybaldıev otbasyndaǵy bereke qyzyqpen qosa syrttan soǵar yzǵardyń lebin seze otyryp, Gúlnar Mirjaqypqyzyn jary retinde qalaǵan eken. Eger taıǵaq dáýirdiń taram jolynda dál osyndaı súıenish serik kezdespese, Gúlnar apaıdyń taǵdyr-talaıy basqasha syzylar edi» dep jazypty (G.M.Dýlatova Alashtyń sónbes juldyzdary: estelik – esse. – Almaty: Mektep, 2022. 4-b).
