Qarjy ınstıtýtynyń habarlaýynsha, túgendeý rásimi kezekte turǵan azamat týraly málimetterdiń ózektiligin tekserýge baǵyttalǵan. Atap aıtqanda, otbasy quramy, sanaty jáne turǵyn úıiniń bar-joǵy qaıta qaralady. Ol úshin azamattar prosedýrany arnaıy portal arqyly ótip, derbes derekterdi óńdeýge kelisim berýi qajet.
Eger kezekte turǵan azamat túgendeýden ótpese, ol turǵyn úıge muqtajdar tiziminen shyǵarylmaıdy. Alaıda derekter tekserilgenge deıin bank oǵan jaldamaly páter usyna almaıdy jáne jyldyq 2 nemese 5 paıyzdyq mólsherlememen jeńildetilgen nesıe berilmeıdi.
«Otbasy bank» salymshylaryna memlekettik syılyqaqy 1 naýryzda aýdarylady
Buǵan deıin ýaqytsha tártip qoldanylǵan. Alǵashqy kezeńde jańa júıeni jyldam iske qosý úshin bank páterlerdi túgendeýsiz bólip, tek sodan keıin kezekte turǵan azamattardyń málimetin teksergen. Bul keı jaǵdaıda qıyndyq týǵyzǵan.
«Keıde túgendeý barysynda kezekte turǵan adamnyń buryn baspana satyp alǵany anyqtaldy, ıaǵnı ol endi turǵyn úıge muqtaj emes bolyp shyqty. Taǵy bir jaǵdaıda otbasy quramynda ózgeris bolyp, bala sany artqanymen, oǵan shaǵyn páter bólingen jaıttar kezdesti. Mundaı jaǵdaıda barlyq prosesti qaıta bastaýǵa týra keldi, al bul qosymsha ýaqytty talap etti», dep túsindirdi bank ókilderi.
Otbasy bank turǵyn úıdi ulttyq damý ınstıtýty mártebesinde bólip otyr. Búginde oblys ákimdikteri bankke 13 393 páter tapsyrǵan. Onyń 8 846-sy jaldamaly turǵyn úıge, 4 547-si nesıelik baspanaǵa arnalǵan. Páter bólý bastalǵaly beri 4 216 otbasy qonys toıyn toılaǵan. 24 aqpandaǵy málimetke sáıkes, 257 myń azamat derekterdi túgendeý rásiminen ótken.
Jańa tártip turǵyn úıdi ádil bólýge jáne kezekte turǵandardyń naqty jaǵdaıyn eskerýge múmkindik bermek.
