Ekspozısııa Qazaqstannyń halyq ártisi, akter ári opera ánshisi Káýken Kenjetaevtyń 110 jyldyǵy men Qazaqstannyń eńbek sińirgen ártisi, kınoakter Meńtaı О́tepbergenovtiń 80 jyldyǵyna arnaldy.
Kórmege qoıylǵan jádigerler arasynda sırek kezdesetin qujattar men fotosýretter, sahnalyq kostıýmder men jeke zattar, sondaı-aq HH ǵasyrdyń kıno keńistigin aıǵaqtaıtyn qundy muralar bar. Ásirese Meńtaı О́tepbergenovtiń jeke kolleksııasynan usynylǵan 1931–1970 jyldar aralyǵynda jaryq kórgen 200-ge jýyq kınoafısha, 1932–1990 jyldary shyǵarylǵan biregeı fotokameralar, ashyq hattar men kıno jýrnaldary kelýshilerdiń aıryqsha qyzyǵýshylyǵyn týdyrdy. Bul jádigerler qazaq kınosynyń qalyptasý kezeńinen bastap, keńestik kezeńdegi shyǵarmashylyq izdenisterge deıingi aralyqty qamtyp, tutas bir dáýirdiń tynysyn sezindiredi.
Sonymen qatar ataýly is-shara aıasynda «Káýken Kenjetaev» atty kitaptyń tusaýy kesildi. Arhıvtik derekterge súıene otyryp jazylǵan bul eńbek óner ıesiniń shyǵarmashylyq jolyn, sahna men ekrandaǵy jarqyn beınelerin, ulttyq mádenıetke qosqan ólsheýsiz úlesin tereńinen tarqatady.
Taǵylymdy jıynda Abaı atyndaǵy Qazaq ulttyq opera jáne balet teatry ártisteri óner kórsetip, Káýken Kenjetaev oryndaǵan partııalardan úzindiler shyrqaldy. Bul kórermenge ótken ǵasyrdyń sahnalyq rýhyn qaıta sezindirgen áserli sátterdiń biri boldy. Kesh sońynda Káýken Kenjetaevtyń qatysýymen túsirilgen «Gaýhartas» fılminiń óńdeýden ótken, jańartylǵan nusqasy alǵash ret kórermenge jol tartty. Kınotýyndynyń jańa sapada kórsetilýi – ulttyq kıno murasyn saqtaý men jańǵyrtý jolyndaǵy mańyzdy qadam. Sondaı-aq Meńtaı О́tepbergenov basty róldi somdaǵan «Strannyı mır jelanıı ı nadejd» fılminiń kórsetilimi boldy.
«Uly mura – urpaqqa ósıet» kórmesi – mereıtoılyq shara ǵana emes, ulttyq kıno óneriniń tarıhyna taǵzym, urpaqtar sabaqtastyǵyn aıshyqtaıtyn rýhanı kópir. Kıno ónerine qatysty sırek derekter men arhıvtik qazynalar arqyly kórermen qazaq mádenıetiniń baı murasymen qaıta qaýyshty.
