Onyń aıtýynsha, otyz jylda álem jáne qoǵam ózgerdi. Jańa suranystar, jańa talaptar, jańa qundylyqtar paıda boldy. Keıbir máselelerdi qoǵam 30 jyl burynǵydaı emes, qazir múldem basqasha qabyldaıdy.
«Mysaly, ekologııa máselelerin alaıyq. Qazirgi qoldanystaǵy Konstıtýsııada bul taqyryp múldem qamtylmaǵan. Dástúrli qundylyqtardy qorǵaý máselesi de qazir ózekti taqyrypqa aınaldy. 1995 jyly mundaı mindet qoıylǵan joq. Sonymen qatar, jańa Ata zańda memlekettiń zaıyrlyq sıpaty naqty bekitilgen. Bul da – qoǵamda sońǵy jyldary qalyptasqan suranystardyń biri. Biz, árıne, rýhanı damýdy, ımandylyqty qoldaımyz. Biraq, deı turǵanmen de, memleket pen dinniń arajigin ajyratý kerek. «Neke – er men áıeldiń memleket zańǵa sáıkes tirkegen erikti jáne teń quqyqty odaǵy» degen normany engizdik. Áıelderdiń quqyqtaryn qorǵaý da ózekti máselege aınaldy. Jańa Konstıtýsııada buǵan qatysty da naqty normalar qamtylǵan. Mine, sońǵy jyldary paıda bolǵan osyndaı suranystardy qalaıda eskerý qajettiligi týyndady», dedi Memlekettik keńesshi.
Osy oraıda Erlan Qarın qoǵamda jıi talqylanatyn másele – «Jańa Konstıtýsııa tek bıliktiń ǵana múddesin kózdep otyrǵan joq pa? Qarapaıym adamdardyń múddesi eskerýsiz qalǵan joq pa?» degen saýalǵa naqty jaýap berdi.
«Bul suraqqa da senimdi túrde jaýap bere alamyz. Jańa Konstıtýsııa eń aldymen adamdardyń múddesi, quqyqtary men bostandyqtaryn birinshi orynǵa qoıady. 1995 jyly qabyldanǵan qoldanystaǵy Konstıtýsııa negizinen memleket múddesi men ókilettigin qamtyǵan bolsa, jańa Ata zań el damýynyń adamı ólshemin engizdi. Sol úshin adam quqyqtary negizgi basymdyq retinde aıqyndaldy. Jańa Ata zańda «adam» degen sóz qazirgi Konstıtýsııamen salystyrǵanda 1,5 ese kóp qoldanylǵan, ıaǵnı, 76 ret atalǵan. Bul da jaıdan jaı emes. Másele qaıta-qaıta atalýynda emes, másele – kóptegen normalarda adamnyń múddesi, adamnyń quqyqtary qamtamasyz etilgen. Bul jaıt jańa Konstıtýsııanyń qarapaıym adamdardyń múddesine baǵyttalǵanyn kórsetedi. Sebebi, memlekettiń basty qazynasy da, tiregi de – onyń azamattary», dep túıindedi Erlan Qarın.
