vıdeodan alynǵan kadr
Taıaý Shyǵystaǵy ahýaldyń ýshyǵýy men áýe keńistiginiń jabylýyna baılanysty júzdegen Qazaqstan azamaty BAÁ aýmaǵyndaǵy qonaqúıler men áýejaılarda qalyp qoıǵan. Qazirgi ýaqytta sol jerde júrgen týrısterdiń aıtýynsha, keıbir azamattardyń qonaqúıdegi turý merzimi uzartylmaǵan.
«Demalysymyz naǵyz qıyndyqqa ulasty. Áýejaıda naqty aqparat berilmeıdi. Týroperatorlar jaýapkershilikten bas tartyp, jaǵdaıdy óz moıyndaryna almaı otyr. Balalarymyzben birge dalada qalý qaýpi bar. Qurmetti Prezıdent, bizge qoldaý kórsetýlerińizdi suraımyz», delingen beıneúndeýde.
Otandastarymyz áleýmettik jelide 2-3 naýryzǵa josparlanǵan reısteriniń toqtatylǵanyn, áýejaıdyń jabylǵanyn, qonaqúı baǵasynyń kúrt óskenin jazyp jatyr.
Olar Syrtqy ister mınıstrliginen shuǵyl shara qabyldap, azamattardyń elge aman-esen oralýyna járdemdesýdi talap etip otyr.
Irandaǵy mektepke jasalǵan shabýyl: qaza tapqan oqýshylardyń sany 150-ge jýyqtady
Dýbaıdaǵy Qazaqstan konsýldyǵynyń ókili Álnur Amanbek reısterdiń keshigýine baılanysty áýe kompanııasy barlyq shyǵyndy tolyq óteı almaıtynyn málimdegen. Onyń aıtýynsha, qonaqúı aqysy tólenbeıtindikten, keı azamattarǵa ýaqytsha qarjylyq máseleni sheshý úshin týystary men tanystarynan qaryz suraý nemese nesıe rásimdeý qajettigi týyndaýy múmkin.
Konsýl ókiliniń sózinshe, Air Astana qonaqúılerdegi ornalastyrý shyǵyndaryn tolyq jaba almaıtynyn habarlaǵan. Qazirgi ýaqytta kompanııa basshylyǵymen kelissózder júrgizilip jatyr. Sondaı-aq qonaqúılermen arnaıy tómendetilgen baǵa boıynsha kelisim jasaý máselesi qarastyrylýda. Alaıda shyǵyn kólemi úlken bolǵandyqtan, ony tolyq óteý múmkin emes. Shetelde qalyp qoıǵan el azamattarynyń sany 15 myńnan asady, ári árqaısynyń jaǵdaıy ártúrli.
Qazirgi tańda dıplomattar el azamattary men týrıstik agenttikterdiń naqty tizimin jasaqtap jatyr. Týroperator arqyly barǵan týrısterdiń shyǵynyn sol agenttikter óteýi tıis degen usynys aıtylýda. Al joldamany óz betinshe alǵan azamattar úshin qonaqúı tarapynan jeńildikter qarastyrý kózdelip otyr.
Iran aıatolla Hameneıdiń qazasyn rastady: elde 40 kúndik aza tutý jarııalandy
Sonymen birge, Ámirlikter bıligi belgili bir deńgeıde kómek kórsetýge daıyn ekenin bildirgen. Qazaqstan tarapy tıisti joǵary organdarǵa resmı túrde júginip, otandastardyń qonaqúıde turýyna ketken shyǵyndy óteý máselesin kótermek.
