Ǵylym jáne joǵary bilim mınıstrliginiń Ǵylym komıtetine qarasty «Fılosofııa, saıasattaný jáne dintaný ınstıtýty» JShQ RMK bas dırektorynyń orynbasary Ermek Toqtarovtyń aıtýynsha, jańa Ata zańnyń qabyldanýy ǵylym úshin mańyzdy jańalyq bolmaq. Ol ǵylymnyń qundylyq retinde Negizgi zań preambýlasynda, sondaı-aq strategııalyq basym baǵyt retinde úshinshi bapta atalǵanyna toqtaldy.
Bıbigúl Jeksenbaı: Jańa Konstıtýsııa – Ulttyq quryltaıda bastalǵan reformalardyń logıkalyq jalǵasy
«Bizdiń qoǵam úshin ǵylymnyń damýy asa ózekti másele. Jańa Konstıtýsııa osy salaǵa birqatar ózgeris alyp kelmek. Máselen, aldaǵy 2028 jyldan bastap ǵylymdy qarjylandyrý júıesi ózgeredi. Jergilikti atqarýshy organdarǵa ǵylymı zertteýler júrgizý úshin tapsyrys berýge múmkindik qoljetimdi bolady. Bul ǵalymdarymyzdyń jumys isteýine úlken múmkindikter týǵyzbaq», dep atap ótti ol.
Atalǵan ınstıtýttyń bas ǵylymı qyzmetkeri Asqar Shomanov bıylǵy jyl bastalǵaly elimiz úshin mańyzdy saıası oqıǵalar oryn alyp jatqanyn, sonyń ishinde eń ózektisi jańa Konstıtýsııa jobasyn qabyldaý jónindegi respýblıkalyq referendým ekenin atap ótti.
«Ata zańymyzdyń jańarýy tek mátininiń ózgerýi ǵana emes. Bul bastamalar elimizde sońǵy 5-6 jylda júrgizilip jatqan reformalarmen astasyp jatyr. Jańa Konstıtýsııa bizdiń bolashaq damý traektorııamyzdy aıqyndaýymen qundy. Jobaǵa eldiń saıası ómirin ǵana emes, memlekettik basqarý júıesin jańǵyrtýǵa baǵyttalǵan erejeler de engizilgen. Sondaı-aq qarapaıym turǵyndardyń da jeke ómirlerine qatysty máselelerdi qozǵaıdy. Sondyqtan biz tarıhı mańyzy zor betburysqa kýá bolyp otyrmyz», dedi ol.
Ǵalym, sondaı-aq, búgingi konstıtýsııalyq reformalardy 1995 jyly búkilhalyqtyq referendýmda jańa Ata zańymyzdyń qabyldanýymen salystyrýǵa bolatynyn aıtty.
«Qazirgi qoldanystaǵy Konstıtýsııa sol ýaqytta bizdiń aldaǵy ondaǵan jylǵa arnalǵan strategııalyq damý jolymyzdy aıqyndaǵan bolatyn. 15 naýryzda respýblıkalyq referendýmda jańa Ata zańymyz qabyldanar bolsa, ol da bizdiń memlekettiń jáne qoǵamnyń aldaǵy jyldarǵa arnalǵan damý baǵytyn aıqyndap beretini sózsiz. Men bizdiń halqymyz jańa jobany qoldaıdy dep úmittenemin», dep sózin túıindedi ol.
«M.A. Aıthojın atyndaǵy molekýlalyq bıologııa jáne bıohımııa ınstıtýty» JShQ RMK ǵylymı qyzmetkeri Aqbota Rabatqyzy óz sózinde ǵylym – eldiń tehnologııalyq damýy men básekege qabilettiliginiń negizi ekenin jetkizdi.
«Jańa Konstıtýsııa jobasynda bilim men ǵylymnyń damýyna qatysty mańyzdy normalar bar. Men jas izdenýshi ǵalym retinde bul bastamalardyń mánin túsinemin. Sondyqtan 15 naýryzda durys sheshim qabyldaımyn», dedi ol.
