Sársen Amanjolov atyndaǵy Shyǵys Qazaqstan ýnıversıtetinde Jalpyulttyq koalısııanyń «Ádiletti jáne progressıvti Qazaqstannyń Halyqtyq Konstıtýsııasy úshin!» bastamasymen kezdesý ótti. Delegasııany Premer-mınıstrdiń orynbasary – Mádenıet jáne aqparat mınıstri Aıda Balaeva bastap keldi. Jıynǵa Májilis depýtattary Lúkbek Tumashınov, Sergeı Ponomarev, Qazaqstan kásipodaqtar federasııasynyń tóraǵasy Satybaldy Dáýletalın, «Eýrazııa» birinshi arnasynyń baspasóz hatshysy Polına Shımanskaıa, ýnıversıtet rektory Muhtar Tólegen jáne ózge de ókilder qatysty.
Kezdesý barysynda Aıda Balaeva Konstıtýsııalyq reforma jekelegen túzetýlermen shektelmeıtinin, el damýynyń sapasyna áser etetin túbegeıli ózgeristerdi kózdeıtinin atap ótti.
«Búgin Jańa Konstıtýsııa jobasyn talqylaı otyryp, biz úlken ne kishi túzetýler jaıyn sóz etip otyrǵan joqpyz. El damýynyń baǵyty túbegeıli jańarady. Bul, birinshiden, ulttyq qundylyqtardyń máńgiligi, eń bıiginde Táýelsizdigimiz turǵan ustanym. Ekinshiden, quqyǵy men bostandyǵy ǵylym, mádenıet jáne ınnovasııa qundylyqtarymen nyǵaıtylǵan, básekege qabiletti urpaq qalyptastyrý. Úshinshiden, Ulttyń qazirgi álemdik tártiptegi orny men rólin qaıta paıymdaý», dedi ol.
Vıse-premer jobanyń tuǵyrnamalyq negizin Memleket basshysynyń bastamalary quraıtynyn da aıryqsha aıtty.
«Jańa Konstıtýsııanyń tujyrymdamalyq ózegin «Adal azamat», «Zań men tártip», «Taza Qazaqstan» sııaqty Prezıdent bastamalary qalyptastyrdy. Osyǵan baılanysty Qasym-Jomart Kemelulyn Negizgi zańnyń basty avtory deýge tolyq negiz bar. Memleket basshysy qoǵamnan túsken árbir usynysty jeke qarap, aıtylǵan synǵa da mán berip, odan naqty qorytyndy shyǵardy», dep túıindedi Aıda Balaeva. Bul jerde Qasym-Jomart Toqaevtiń jeke qatysýymen qalyptasqan qoǵamdyq dıalogtyń mańyzy atap ótildi.
Shyǵys Qazaqstan oblysynyń ákimi Nurymbet Saqtaǵanov jobanyń keń qoǵamdyq talqylaýdan ótkenin jetkizdi.
«Jańa Konstıtýsııa jobasy azamattar, saıası partııalar, qoǵamdyq uıymdar men sarapshylar qaýymynyń usynystaryn eskere otyryp daıyndaldy. Bul – shyn máninde búkilhalyqtyq jumys nátıjesi», dedi ol.
Aıda Balaeva: Jańa Ata zań adam quqyǵy men bostandyǵyn basty orynǵa qoıady
Instıtýsıonaldyq jańalyqtarǵa toqtalǵan Májilis depýtaty Lúkbek Tumashınov tarıhı sabaqtastyq pen basqarý júıesiniń turaqtylyǵy máselesin tarqatty.
«Quryltaı ataýy tereń tarıhtan bastaý alady. Vıse-prezıdent ınstıtýtyna qatysty pikir kóp aıtyldy, alaıda mundaı tájirıbe kóptegen elderde bar. Bul ınstıtýt júıeniń ornyqtylyǵyn qamtamasyz etýge baǵyttalǵan. Quryltaı qalyptasqan soń Prezıdent kandıdatýra usynady, depýtattar daýys beredi. Vıse-prezıdent birqatar baǵytta, sonyń ishinde halyqaralyq baılanystarda jumys atqarady, al tótenshe jaǵdaıda bılik sabaqtastyǵyn saqtap, saılaýdy belgilengen merzimde uıymdastyrýǵa jaýapty», dedi depýtat.
Ýnıversıtet alańyndaǵy pikirtalasta adamı kapıtaldyń róli de keńinen sóz boldy. Ýnıversıtet rektory Muhtar Tólegen adam damýyna basymdyq berý bilim men ǵylymdy óńirlik básekege qabilettiliktiń ózegine aınaldyratynyn aıtty.
«2026 jylǵy Konstıtýsııalyq reforma – normalardy jańartý ǵana emes, Ádiletti Qazaqstandy qurý logıkasyna saı ınstıtýsıonaldyq jańǵyrý. Adamı kapıtaldy damytýǵa konstıtýsııalyq deńgeıde basymdyq berý – eldiń strategııalyq tańdaýy. Bilim men ǵylym ekonomıkalyq ósimniń, tehnologııalyq egemendiktiń jáne óńirlik básekege qabilettiliktiń qozǵaýshy kúshine aınalyp otyr», dedi ol.
Kezdesý qorytyndysynda qatysýshylar Jańa Konstıtýsııa eldiń bolashaǵyna aıqyn baǵdar beretinin, mátinde bilim, ǵylym, ınnovasııa, ekologııalyq jaýapkershilik jáne keler urpaq aldyndaǵy mindetterge erekshe mán kúsheıgenin atap ótti. Qoıylǵan saýaldarǵa jan-jaqty jaýap berilip, referendýmnyń máni túsindirildi.
