Foto: Ashyq derekkóz
Sotta anyqtalǵandaı, S. mektep dırektory bola otyryp, bas býhgalter A.-men sóz baılasyp, 2015 jylǵy qazannan 2024 jylǵy tamyzǵa deıin oqý ornynda is júzinde jumys istemegen 6 eden jýýshyny tabelge negizsiz engizip otyrǵan. Sonyń saldarynan shamamen 29 mln teńge kóleminde qarajat jymqyrylǵan.
Budan bólek, S. 2015-2024 jyldary mektep jarǵysynda kózdelmegenine qaramastan, jeke-dara sheshim qabyldap, 501 oqýshyǵa bilim berý qyzmetiniń aqysyna jalpy somasy 183 mln teńge kóleminde zańsyz jeńildik bergen. Atalǵan mektepte oqý aqyly negizde júrgizilgen.
Sot S.-nyń bul áreketterin qyzmettik ókilettikterin qyzmet múddesine qaıshy paıdalaný, ózge tulǵalarǵa negizsiz artyqshylyqtar berý jáne mekemege eleýli zııan keltirý dep baǵalady.
Oqýshylardy jalǵan tirkeý: 2 966 mektepte zańbuzýshylyq anyqtaldy
2018 jylǵy 1 qańtardan 2024 jylǵy 31 mamyrǵa deıin S. men A. mektep janynan «0» synyptardy uıymdastyryp, ata-analardan aqyly qyzmet úshin qolma-qol aqshany baqylaý-kassa apparatynsyz qabyldaǵan. Túsken qarajat mekteptiń esepshotyna aýdarylmaı, býhgalterlik esepte kórsetilmegen. Osy kezeńde 305 mln teńge kólemindegi qarajat jumsalǵan.
Sonymen qatar S. 2021-2024 jyldary jazǵy lager qyzmetinen túsken, KGÝ esebinde kórsetilmegen 25 mln teńgeni ıemdengeni anyqtaldy.
Taǵy bir epızodta 2017 jylǵy qazannan 2024 jylǵy mamyrǵa deıin S. sheteldik muǵalimderdiń jalaqysyn jasandy túrde kóterý arqyly deldaldar kómegimen 75 mln teńge kóleminde mektep qarajatyn jymqyrǵan.
Tergeý materıaldaryna sáıkes, A. 2017-2024 jyldary qylmystyq jolmen alynǵan bıýdjet qarajatyn zańdastyrý maqsatynda shamamen 176 mln teńgeni jeke depozıttik shotyna aýdaryp, odan 9 mln teńge syıaqy alǵan.
583 mln teńgeden astam zalal: Túrkistanda mektep qarjysyn jymqyrǵan 14 adam sottaldy
Sottalýshylar kinálaryn moıyndamady. Qorǵaý tarapy olardyń áreketterinde qylmys quramy joq ekenin aıtyp, aqtaýdy surady. Alaıda sot jábirlenýshiler ókilderiniń, kýálardyń aıǵaqtaryn, mamandar qorytyndylaryn jáne zattaı dáleldemelerdi negizge ala otyryp, aıyp tolyq dáleldendi degen tujyrymǵa keldi.
Jaza taǵaıyndaý kezinde sot S.-nyń 65 jasta ekenin jáne A.-nyń úsh kámeletke tolmaǵan balasy baryn jeńildetetin mán-jaı retinde eskerdi. Aýyrlatatyn mán-jaılar anyqtalǵan joq.
Degenmen, 2015-2024 jyldary jasalǵan aýyr sybaılas jemqorlyq qylmystarynyń sıpatyn, asa iri mólsherdegi ótelmegen zalaldy jáne zańsyz áreketterdiń uzaq ýaqyt boıy jalǵasqanyn eskerip, sot:
- S.-ny 8 jylǵa bas bostandyǵynan aıyryp, eki qabatty turǵyn úıin, avtoturaq ornyn jáne zergerlik buıymdaryn tárkileý týraly úkim shyǵardy;
- A.-ny 7 jylǵa bas bostandyǵynan aıyryp, avtokóligin, avtoturaq ornyn jáne zergerlik buıymdaryn tárkiledi.A.-nyń úsh kámeletke tolmaǵan balasynyń bolýyna baılanysty bas bostandyǵynan aıyrý jazasyn óteý 1 jylǵa keıinge qaldyryldy.
Sondaı-aq sot 588 mln teńge kólemindegi azamattyq talapty qanaǵattandyrdy. Úkim zańdy kúshine engen joq.
