Táýelsizdik jyldarynda alǵash ret Iаdrolyq fızıka ınstıtýtyna arnaıy salynǵan jataqhana paıdalanýǵa berildi. Jeti qabatty jańa ǵımarat 166 qyzmetker men mamanǵa arnalǵan. Bul nysan ǵylymı-zertteý uıymynyń áleýmettik ınfraqurylymyn kúsheıtip, ǵylym adamdarynyń turmys sapasyn jaqsartýǵa baǵyttalǵan mańyzdy qadam sanalady.
Saltanatty ashylý rásimine elimizdiń Atom energııasy jónindegi agenttiginiń tóraǵasy Almasadam Sátqalıev pen Instıtýttyń bas dırektory Saıabek Sahıev qatysty. Jalpy aýmaǵy 5 082 sharshy metrdi quraıtyn ǵımarat jas ǵalymdarǵa qolaıly jaǵdaı jasap, kadrlyq áleýetti bekemdeýdi kózdeıdi. Bul bastama eldegi ıadrolyq klasterdi qalyptastyrý úderisine de serpin beredi.
Atom energetıkasy mamandary «Bolashaq» baǵdarlamasy aıasynda bilim alady
Jataqhana zamanaýı talaptarǵa saı boı kótergen. Jartylaı jertóle qabatynda jattyǵý zaly, kir jýý bólmesi, qyzmettik úı-jaılar ornalasqan. Birinshi qabatta keń vestıbıýl, qabyldaý aımaǵy, kovorkıng keńistigi, kelissózder zaly, 50 oryndyq ashana qarastyrylǵan. Ár bólme jeke sanıtarlyq torappen, dýsh kabınasymen jabdyqtalǵan. Bul turǵyndardyń turmystyq jaılylyǵyn arttyryp, jeke keńistikti saqtaýǵa múmkindik beredi. Jobalaý kezinde erekshe qajettiligi bar azamattarǵa arnalǵan qoljetimdi orta talaptary eskerilgen.
Almasadam Sátqalıev ǵylymdy ilgeriletý áleýmettik ınfraqurylymnan bastalatynyn jetkizdi. Onyń aıtýynsha, qolaıly orta turaqty ǵylymı ujymdardyń qalyptasýyna jol ashady, daryndy jastardy tartady, atom salasynyń keleshegin aıqyndaıtyn aýqymdy jobalardy júzege asyrýǵa negiz qalaıdy.
Saıabek Sahıev jańa nysan ınstıtýtty jańǵyrtý jolyndaǵy júıeli jumystyń bir belesi ekenin aıtty. Keıingi jyldary ıadrolyq medısına, radıasııalyq tehnologııalar, irgeli zertteýler baǵytynda tyń jobalar qolǵa alynǵan. Jataqhananyń iske qosylýy osy bastamalardyń turaqty damýyna qyzmet etedi.
Ǵalymǵa jasalǵan jaǵdaı – eldiń erteńine salynǵan ınvestısııa. Jańa jataqhana ǵylymı ortada ornyqty kásibı ahýal qalyptastyryp, atom salasynyń strategııalyq mindetterin júzege asyrýǵa negiz bolatyn zamanaýı ekojúıeni nyǵaıta túsedi.
Eske sala keteıik, byltyr jas ǵalymdarǵa páter kilti tabystalǵan bolatyn.
