Ǵylym jáne joǵary bilim mınıstrligi, Eýrazııa ulttyq ýnıversıteti, Tarıhshylardyń ulttyq kongresi uıymdastyrǵan bul jıynda «Táýelsizdik bárinen qymbat», «Adamzattyń Abaıy», «Abaı ǵıbraty» jáne «Ult tarıhyndaǵy tulǵalar» atty tórt birdeı kitaptyń tusaýkeser rásimi ótti.
Atalǵan eńbekter Memleket basshysy Qasym-Jomart Toqaev usynǵan ulttyq ıdeologııa salasyndaǵy strategııalyq bastamalardy qoldaý maqsatynda ázirlengen. Kitaptardyń bas redaktory – mereıli jasqa tolyp otyrǵan Ulttyq ǵylym akademııasynyń akademıgi, tarıh ǵylymdarynyń doktory, professor, ýnıversıtet rektory Erlan Sydyqov.
«Táýelsizdik bárinen qymbat» atty alǵashqy kitap Memleket basshysynyń osy attas maqalasy negizinde daıyndalǵan. Ǵylymı-tanymdyq jınaqqa keıingi bes jyl ishinde merzimdi basylymdarda jaryq kórgen, táýelsiz elimizdiń qalyptasýy men damý tarıhyna arnalǵan mazmundy maqalalar toptastyrylǵan. Eńbekte el táýelsizdiginiń qundylyqtary, ony nyǵaıtý jolyndaǵy jetistikter men syn-qaterler jan-jaqty saralanǵan. Bul kitap – egemendiktiń mánin tereń túsinýge baǵyttalǵan salmaqty ǵylymı eńbek.
«Adamzattyń Abaıy» atty ekinshi kitap qazaqtyń uly oıshyly Abaı Qunanbaıulynyń 175 jyldyǵyna arnalǵan maqalalar jınaǵyn qamtıdy. Onda ǵalymdardyń zertteý eńbekteri, aqyn-jazýshylardyń paıymdaýlary, belgili abaıtanýshylarmen suhbattar jáne tarıhı-derekti materıaldar engizilgen.
Al «Abaı ǵıbraty» atty úshinshi kitapta uly aqynnyń 180 jyldyǵyna oraı jaryq kórgen ǵylymı jáne merzimdi basylymdardaǵy maqalalar toptastyrylǵan. Bul jınaqta abaıtanýshylar men qalamgerlerdiń tereń taldaýlary usynylyp, hakim murasynyń búgingi qoǵam úshin mańyzy aıqyndalǵan. Atalǵan eki eńbek ulttyq zertteýler, personologııa jáne ádebıettaný salasyndaǵy mamandarǵa, joǵary oqý oryndarynyń bilim alýshylaryna jáne jalpy oqyrman qaýymǵa arnalǵan.
«Ult tarıhyndaǵy tulǵalar» atty tórtinshi kitapta Uly dalada ómir súrip, el tarıhynda óshpes iz qaldyrǵan kórnekti qaıratkerler týraly materıaldar jınaqtalǵan. Ǵylymı eńbekte olardyń qoǵamdyq-saıası qyzmeti, memleket qalyptastyrý jolyndaǵy eńbegi men ǵylymı muralary jan-jaqty qarastyrylǵan. Atalǵan jınaq – qazaq memlekettiliginiń qalyptasýy men damýyna úles qosqan tarıhı tulǵalardyń ónegeli ómir jolyn tanytatyn qundy zertteý.
Jıyn barysynda Ǵylym jáne joǵary bilim mınıstri Saıasat Nurbek sóz sóılep, atalǵan eńbekterdiń ulttyq sanany jańǵyrtýdaǵy mańyzyna toqtaldy.
«Erlan Báttashulynyń basshylyǵymen júzege asyp jatqan bastamalar, jańa jobalar men júıeli reformalar joǵary bilim men ǵylym salasynyń damýyna tyń serpin berip keledi. Ýnıversıtet áleýetin arttyrý, basqarý sapasyn jetildirý, halyqaralyq seriktestikti keńeıtý baǵytyndaǵy eńbegińiz zor qurmetke laıyq. Qazirgi tańda elimiz jasandy ıntellekt, jańa tehnologııalar jáne ınnovasııalyq ekonomıka dáýirine qadam basty. Osy úderiste bilim men ǵylymnyń róli aıryqsha. Siz qolǵa alyp otyrǵan jobalar ulttyq múddege qyzmet etetin, el bolashaǵyn aıqyndaıtyn strategııalyq qadamdar», dedi mınıstr.
Odan keıin sóz alǵan Astana qalasy ákiminiń orynbasary Eset Báıken qala ákimi Jeńis Qasymbektiń quttyqtaý hatyn jetkizdi.
«Sanaly ǵumyryńyz ben salıqaly qyzmetińiz elimizdiń bilim berý júıesiniń damýyna, ǵylym men rýhanııattyń órkendeýine jáne elordamyzdyń zııatkerlik áleýetiniń artýyna zor úles qosyp keledi. Siz qalyptastyrǵan ǵylymı mektep pen tárbıelegen bilikti shákirtterińiz – ólsheýsiz eńbegińizdiń aıqyn nátıjesi. Aldaǵy ýaqytta da mol tájirıbeńizdi el ıgiligine jumsap, jas urpaqqa baǵyt-baǵdar berip, úlken býynǵa serpin syılaı beretinińizge senim mol», delingen quttyqtaý hatta.
Al «Qazaq gazetteri» seriktestiginiń dırektory, akademık Dıhan Qamzabekuly elordanyń rýhanı táýelsizdigi Kenesary han eskertkishi men Eýrazııa ulttyq ýnıversıtetinen bastalǵanyn aıta kelip, ózi basqaryp otyrǵan seriktestiktiń atynan mereıtoı ıesin quttyqtady.
«Otandyq tarıh ǵylymy, zııaly qaýym ózińizdi Shákárim ýnıversıtetine, Eýrazııa ulttyq ýnıversıtetine, Tarıhshylardyń ulttyq kongresine, Abaı akademııasyna, jalpy ǵylym salasyna eńbegimen, shyǵarmashylyǵymen, belsendiligimen eńbek sińirgen ǵalym, qoǵam qaıratkeri retinde jaqsy biledi. Ult tarıhyn eldik jańarýymyzdyń ıgiligine aınaldyrý jolyndaǵy izdenisińiz, uıymdastyrý sheberligińiz jańa býyn úshin qashanda ónege. Memleket tarıhyn salalandyrý men tanymaldandyrýdaǵy eren bastamańyzdy, sondaı-aq qunanbaıtaný, abaıtaný, shákárimtaný, alashtaný, taǵy basqa baǵyttaǵy zertteýlerińizdi áriptesterińiz laıyqty baǵalaıdy», dedi D.Qamzabekuly.
