Premer-mınıstrdiń orynbasary Qanat Bozymbaevtyń tóraǵalyǵymen ótken otyrysta Energetıkalyq jáne kommýnaldyq sektorlardy jańǵyrtýǵa arnalǵan ulttyq joba pysyqtaldy. Onda ınfraqurylymdyq bastamalardy qarjylandyrý, esepke alý quraldaryn ornatý, sıfrlyq sheshimderdi engizý sharasy talqylandy. Sý júıelerin basqarýda jańa tehnologııalardy synaqtan ótkizýge arnalǵan pılottyq jobalar da kún tártibine shyqty.
Qazir ulttyq joba aıasynda quptalǵan bastamalardyń jıyntyq quny 974 mlrd teńgege jetti. Onyń 34-i iske asyrý kezeńinde tur. Taǵy 130 joba EPC-merdigerlerdi anyqtaý satysynda. Budan bólek, 145 joba irikteýdiń túrli kezeńderinen ótip jatyr. Bul ınfraqurylymdy jańartý úderisi keń aýqymda júrip jatqanyn ańǵartady.
О́ńirlerdiń jobaǵa daıyndyq deńgeıi saralanyp, arnaıy reıtıng túzildi. Aldyńǵy qatarda Almaty qalasy, Qaraǵandy oblysy men Almaty oblysy kórindi. Mańǵystaý men Ulytaý oblystary ázirlik qarqyny baıaý aımaqtar qatarynda qaldy. Mundaı baǵalaý júıesi jergilikti bıliktiń jaýapkershilik deńgeıin naqty aıqyndaýǵa baǵyttalǵan.
Ulttyq joba sheńberinde kárizdik-tazartý qurylystaryn salý men jańartý jumystary da jalǵasyp keledi. Qazirgi sátte 16 joba tolyq iske asyrýǵa daıyn. Taǵy 6 bastama pysyqtaý kezeńinde tur, jergilikti atqarýshy organdar túpkilikti sheshim qabyldaýy qajet. Bul nysandar qalalardaǵy ekologııalyq qaýipsizdik pen sanıtarlyq jaǵdaıdy jaqsartýǵa yqpal etedi.
«Báıterek» holdıngine kelip túsken ótinimder sany myńnan asty. Ekinshi kezeńde jalpy quny 300 mlrd teńgeden asatyn 144 joba kelisim aldy. Onyń 89-y Qazaqstannyń damý banki men ekinshi deńgeıli bankter arqyly tikeleı kredıtteý tetigimen qarjylandyrylady. 55 joba «Qazaqstandyq turǵyn úı kompanııasy» arqyly memlekettik baǵaly qaǵazdardy satyp alý jolymen maquldanǵan.
Ulttyq jobanyń elektrondyq satyp alý platformasyna arnalǵan baılanys ortalyǵy jumysyn bastady. Iske qosylǵan ýaqyttan beri 800-den astam ótinish qabyldanǵan. Qazir platformany Bitrix júıesimen biriktirý jumystary aıaqtalýǵa jaqyn. Bul qadam satyp alý rásimderin jedeldetip, qatysýshylarǵa qolaıly sıfrlyq orta qalyptastyrýdy kózdeıdi.
Otyrys barysynda Qanat Bozymbaev jeliler uzyndyǵy, qarjylandyrý kólemi, óńirlik bólinis tárizdi naqty parametrler qamtylǵan jospar-keste bekitilgenine qaramastan, keı kórsetkishterde kesheýildeý baryn aıtty. Ár ındıkatorǵa jaýapty memlekettik organdar belgilengen. Vıse-premer maqsatty nátıjelerge qol jetkizý týraly tolyq ári naqty málimet usynýdy talap etti. Ýaqyt mejesi buzylǵan jaǵdaıda laýazymdy tulǵalardyń jeke jaýapkershiligi qaralatyny eskertildi. KPI kórsetkishteriniń oryndalmaýy basqarý sapasyna tikeleı baǵa beretin faktor retinde qarastyrylady.
