Sofııa Aǵzamqyzy – ustazdyq joldy júrek qalaýymen tańdaǵan jannyń biri. Pedagogıkalyq bilim alyp, eńbek jolyn aýyl mektebinde bastaǵan jas mamanǵa ustazdyq jaı ǵana mamandyq emes, ómirlik mıssııaǵa aınaldy. Ol 1961 jyldan 1988 jylǵa deıin Amangeldi orta mektebinde taban aýdarmaı qyzmet etip, birneshe býyn shákirt tárbıeledi. Sol jyldary aýyl mektebi bilim ordasy ǵana emes, tárbıeniń, mádenıettiń, adamgershilik qundylyqtardyń ortalyǵy bolatyn. Ustaz osy jaýapkershilikti tereń sezine bildi.
Matematıka – talap pen tabandylyqty qajet etetin pán. Sofııa apaı ár shákirttiń qabiletin tanyp, kúrdeli ǵylymdy túsinikti jetkizýge erekshe mán berdi. Onyń sabaǵynda tártip te, talap ta, meıirim de qatar júretin. Sondyqtan shákirtteri ustazyn ádildigi men janashyrlyǵy úshin qurmetteıtin. Búginde ár salada eńbek etip júrgen kóptegen azamat alǵashqy ómirlik baǵytty dál osy ustazdyń táliminen alǵanyn maqtanyshpen aıtady.
Ustazdyń aǵartýshylyq qyzmeti kúndelikti sabaqpen ǵana shektelgen joq. Aýyl jastarynyń bilimin tolyqtyrý maqsatynda ashylǵan keshki oqýǵa jetekshilik etip, túrli sebeppen oqýyn jalǵastyra almaǵan jastardyń orta bilim alýyna jaǵdaı jasady.
Sondaı-aq Sofııa Aǵzamqyzy áriptesteri arasynda bilimimen de, adamgershilik bolmysymen de erekshelendi. Sypaıylyǵy, sabyrly minezi, mádenıetti qarym-qatynasy ony kópshilikke úlgi etti. Birneshe tildi meńgerip, ónerge jaqyn bolýy da onyń jan-jaqty tulǵa ekenin kórsetti. Án aıtyp, qoǵamdyq jumystarǵa belsene aralasyp, aýyl ómiriniń rýhanı tynysyna úles qosty. Uzaq jyl áıelder keńesin basqaryp, aýyl birligi men tatýlyǵyn nyǵaıtýǵa atsalysty.
Ustazdyń ómirindegi taǵy bir úlken beles – otbasy tárbıesi. О́mirlik jary Slamhan Aıtmuhanbetulymen birge úlken áýlettiń irgesin qalap, 5 qyz, 2 ul tárbıelep ósirdi. Balalary men nemere-shóbereleri bilim men eńbekke adal bolyp ósip, árqaısysy qoǵamnyń túrli salasynda qyzmet etip jatyr. Búginde bul shańyraqty ustazdar áýleti dep ataýǵa tolyq negiz bar. Urpaqtarynyń edáýir bóligi pedagogıkalyq joldy tańdap, eldiń túkpir-túkpirinde shákirt tárbıelep júr.
Uzaq jylǵy eńbegi memleket tarapynan da joǵary baǵalandy. Bilikti pedagog «Ardager ustaz» medalimen marapattalyp, Oqý-aǵartý mınıstriniń Alǵys hatyna ıe boldy. Bul marapattar – ustazdyń mańdaı teri men adal eńbeginiń kórinisi ǵana emes, shákirt júregindegi shynaıy alǵystyń belgisi.
Aýyl turǵyndary Sofııa apaıdy muǵalim retinde ǵana emes, parasatty ana, aqylshy áje, elge syıly jan retinde tanıdy. Qonaqjaılylyǵy men keń peıili, keshirimdiligi men qarapaıym bolmysy ony jurtshylyqqa jaqyn etti. Ardaqty ustazdyń úıi árdaıym bereke men birliktiń ordasyna aınalǵan.
«Adam urpaǵymen myń jasaıdy» deıdi dana halqymyz. Sofııa Aǵzamqyzy tárbıelegen shákirtteri men ósirgen urpaǵy – onyń ǵumyrynyń jalǵasy, eń úlken jetistigi. Búginde nemere-shóbere qyzyǵyn kórip otyrǵan ardaqty ustaz – birneshe býynnyń júreginen oryn alǵan tulǵa.
Toqsan jyldyq ǵumyr – ýaqyt ólshemi ǵana emes, elge sińgen eńbek pen tárbıelengen taǵdyrlardyń jıyntyǵy. Ustazdyń júrip ótken joly jas urpaqqa adal eńbek pen bilimge qyzmet etýdiń aıqyn úlgisi bolyp qala bermek.
Baǵdat SANSYZBAEVA,
shákirti
Shyǵys Qazaqstan oblysy,
Zaısan aýdany,
Birjan aýyly
