Memleket basshysy Nursultan Nazarbaev elordadaǵy «Saryarqa» velotreginde Naýryz meıramyna oraı ótken merekelik sharaǵa qatysty.
Merekelik teatrlandyrylǵan qoıylym «Jańǵyrǵan tabıǵat, baq qonǵan el», «Qazaqstan – nurly jol!», «Astana – Máńgilik Eldiń ortasy», «Naýryz – nurly jol» atty tórt bólimnen quraldy. Sharada belgili qazaqstandyq ónerpazdar án shyrqap, bı bıledi.
Elorda turǵyndary men qonaqtary aldynda sóz sóılegen Nursultan Nazarbaev barsha Qazaqstan halqyn Naýryz meıramymen quttyqtady.
– Qurmetti qaýym, qazaqstandyqtar, otandastar, barshańyzdy áz Naýryz meıramymen shyn júrekten quttyqtaımyn. Bizdiń bul merekemiz – ata-babamyzdan kele jatqan úlken mereke. Kóp memleketter bul kúndi jańa jyl dep sanaıdy. Bizdiń tarıhymyzda birneshe júz jyldan buryn atap, kóktemniń alǵashqy kúninde aǵaıyndar bir-birimen qaýyshyp, týysqandar birin biri qystan shyǵyp kórip, barlyq oryn alǵan jamanshylyqtardy keshirip, bir-birine kómektesip, naýryz kóje úlestirip jatatyn. Biz elimizdiń aq tilekpen, birlikpen táýelsizdigin ornattyq. Qazaqstandy dúnıejúzine belgili memleket ettik. Qandaı qıyn-qystaý zaman bolsa da birge bolyp, birligimizden ajyramaı, alǵa basyp kele jatyrmyz. Elimiz kórkeıdi, el ordasy – halyqtyń, memlekettiń júregi búkil dúnıejúzine belgili boldy, – dedi Elbasy.
Memleket basshysy elimizdiń bolashaqtaǵy baǵdarynyń da belgili ekendigin atap ótti. «Qıyndyqtarǵa qaramastan, bizdiń halqymyz árdaıym tutastyǵyn saqtady jáne alǵa qaraı senimmen júrip otyrdy. Álemde daǵdarys kórinisteri baıqalyp otyrǵan qazirgi kezde de Qazaqstannyń olardy eńserýge qajetti resýrstary jetkilikti. Bizdiń elimiz óziniń budan ári damýynyń josparlaryn, sonyń ishinde «Qazaqstan-2050» Strategııasyn, «Nurly Jol» baǵdarlamasyn, jańa áleýmettik jáne ınfraqurylymdyq nysandardyń jobalaryn ázirlep, júzege asyrýda. Osynyń bárine halyqtyń birligi, bir-birine degen qurmeti men senimi, eldiń turaqtylyǵy qajet. Eger biz tańdaǵan jolymyzdan aýytqymaı júretin bolsaq, Qazaqstannyń bolashaǵy budan da jarqyn bolady. Tabysty bolaıyq, aman bolaıyq. Naýryz qýanysh, baqyt, bereke alyp kelsin!» – dedi Nursultan Nazarbaev.
Merekelik konsertten keıin Memleket basshysy «Astana-Arena» stadıonynyń janynan Naýryz meıramyna arnaıy qurylǵan etnoaýyldy aralap, qala turǵyndarymen júzdesti. Elimizdegi túrli etnostyń ónerin tamashalady.
«Búgin – tamasha mereke. Kóktemniń jarqyrap turǵan kúni. Qys bitip, jylý kelip, tabıǵattyń barlyǵy tirilip, barlyǵy qýanatyn kez. Osy kezben bizdiń Naýryz degen dástúrli, uly merekemiz, Ulystyń uly kúni týra keledi. Ata-babamyzdan qalǵan dástúr boıynsha bul kúni aǵaıyndar bir-birin keshirip, bir-birimen qaýyshyp, jaqsylyq, bereke, baqyt tileıdi. Kelesi jylǵa deıin el aman, jurt tynysh bolsyn deıdi. Sondyqtan, biz de búgin Qazaqstannyń barlyq túkpirinde Naýryz merekesin toılap jatyrmyz. Barsha Qazaqstan halqyna sálemimdi joldap, amandyq pen jaqsylyq tileımin! Barshamyz bolyp elimiz aman, jurtymyz tynysh bolsyn dep tileıtin bolsaq, aldymyzǵa qoıǵan maqsattar men halyqtyń bolashaǵyna jumsalatyn kúsh-qýat júzege asyp, elimiz berekeli bolady. Naýryz qutty bolsyn!» – dedi Elbasy etnoaýylda sóılegen sózinde.
Alańda tigilgen otaýlarda ár etnos ókilderi ulttyq kıimderin kıip, án shyrqap, jurtshylyqqa naýryz kóje taratty. Sonymen qatar, etnoaýylǵa kelgen qala turǵyndary men qonaqtary ulttyq sport saıystary men oıyndaryna qatysyp, meıramǵa oraı uıymdastyrylǵan sharalardy tamashalady. Memleket basshysy osy etnoaýylda naýryz kójeden dám tatty.
Dınara BITIKOVA,
«Egemen Qazaqstan».
Sýretterdi túsirgender
S.BONDARENKO, B.OTARBAEV.
