Sýret: kaz.zakon.kz
Jıynda azyq-túlik qaýipsizdigi, aýyl sharýashylyǵy ónimderiniń eksporty men ımportyna qatysty birqatar mańyzdy sheshim qabyldandy. Ishki naryqtaǵy baǵa ahýaly turaqtanyp, qoıma qorlary jetkilikti ekeni eskerildi. Osy jaǵdaı kartop eksportyna ýaqytsha shekteý engizýdiń qajeti joq ekenin kórsetti. Komıssııa músheleri eksportty shekteý týraly usynysty qoldamady.
Sıyr etin syrtqy naryqqa shyǵarýǵa arnalǵan kvota berý tártibin jeńildetý máselesi de talqylandy. Qoldanystaǵy talaptar eksporttaýshylardan keminde 5 myń basqa arnalǵan bordaqylaý alańy men jeke et kombınatyn talap etedi. Komıssııa otyrysynda Úkimet bekitken Mal sharýashylyǵyn damytýdyń keshendi jospary eskerildi. Qujat iri qara mal sanyn 7,9 mln bastan 12 mln basqa jetkizýdi, eksporttyq áleýetti arttyrýdy kózdeıdi. Osyǵan baılanysty Aýyl sharýashylyǵy mınıstrligi kvota bólý qaǵıdalaryna ózgeris engizedi.
Analyq mal basyn saqtaý máselesi de nazardan tys qalǵan joq. Qaıta óńdeý kásiporyndaryn shıkizatpen qamtamasyz etý maqsatynda Qazaqstannan iri qara men usaq maldyń analyq basyn, buqashyqtaryn syrtqa áketýge qoıylǵan shekteýdi uzartý jóninde sheshim qabyldandy. Bul talap Eýrazııalyq ekonomıkalyq odaq elderine de qatysty.
Qus sharýashylyǵy salasyndaǵy jaǵdaı da qaraldy. Elde 70 qus fabrıkasy jumys isteıdi. Onyń 34-i jumyrtqa baǵytynda, 29-y et óndirýge mamandanǵan, 7 kásiporyn asyl tuqymdy qus ósiredi. Byltyr taýyq jumyrtqasynyń óndirisi 4 568,5 mln danaǵa jetip, 2,4 paıyzǵa ósti. Ishki naryqty qamtý deńgeıi 98 paıyzdy qurady. Osy kórsetkishterdi eskere otyryp, alty aı merzimge EAEO elderinen taýyq jumyrtqasyn ımporttaýǵa tyıym salý týraly sheshim qabyldandy. Tıisti buıryqty Aýyl sharýashylyǵy mınıstrligi shyǵarady.
Komıssııa otyrysynda temirjol salasyna qatysty usynys ta qaraldy. Másele temirjol jyljymaly quramyna arnalǵan bólshekter men temirjol tóseminiń elementterin úshinshi elderden ákelýge shekteý qoıýǵa baılanysty boldy. Talqylaý barysynda otandyq jıyntyqtaýshy óndirýshilerdiń, lokomotıv shyǵaratyn kásiporyndardyń, tutynýshylardyń ustanymy tyńdaldy. Qorytyndysynda mundaı shekteý engizý orynsyz degen sheshim qabyldandy.
Degenmen ulttyq óndirýshilerdi qoldaý máselesi nazarda qaldy. «Qazaqstan temir joly» UK-ge jyljymaly quramǵa arnalǵan qosalqy bólshekter men temirjol tósemi elementterin satyp alý kezinde otandyq ónimge basymdyq berý tapsyryldy.
