Qymbatty hanymdar!
Sizderdi Halyqaralyq áıelder kúnimen shyn júrekten quttyqtaımyn!
Osy tamasha meıram – barsha názik jandylar qaýymyna arnalǵan erekshe sezim men zor qurmettiń jarqyn kórinisi. Áıel – kóńilge shattyq syılap, shabytqa qanat bitiretin kórkemdik pen sulýlyqtyń sımvoly, jasampazdyq pen jańashyldyqtyń qaınar kózi. Dúnıedegi jaqsylyq ataýlynyń bári áıel zatynan bastaý alady.
Áıeldiń jany názik bolsa da, bolmysy – myqty. Olar kez kelgen qıyndyqty eńserip, árdaıym danalyq pen daralyqtyń, shydamdylyq pen batyldyqtyń, senimdilik pen jaýapkershiliktiń ozyq úlgisin kórsetip keledi. Árbir áıeldiń ómirge nár beretin, álemge jaryq syılaıtyn, joqtan bar jasaıtyn, tipti, jaýlasqandy tatýlastyryp, beıbitshilikke shaqyratyn ǵajap qasıeti bar. Áıel tabıǵatynyń basty qupııasy men syry da – osynda.
«Áıel – ulttyń jany» desek, artyq bolmaıdy. О́zderińiz bergen tálim-tárbıe arqyly urpaqtyń dúnıetanymy qalyptasady, jastar ádeptilik, otanshyldyq, eńbekqorlyq, bilimpazdyq syndy asyl qasıetterdi boıyna sińiredi.
Uly dalanyń qaısar qyzdary jaıly ańyzǵa bergisiz aqıqat áńgimeler ǵasyrdan ǵasyrǵa jalǵasyp keledi. Qazaq arýlarynyń parasattylyǵy men batyrlyǵy jurtymyzdyń jadynda jattalyp, tarıhynda tańbalanyp qalǵan. Osy sabaqtastyq qazir de saqtalyp otyr. Kóptegen qyz-kelinshekter Otanymyzǵa qaltqysyz qyzmet etip, mektepter men ýnıversıtetterde, emhanalar men zerthanalarda, memlekettik mekemeler men qoǵamdyq uıymdarda, óner men bızneste, óndiris oryndary men sharýashylyqtarda, áskerı bólimshelerde jáne el ómiriniń basqa da salalarynda abyroıly eńbek etip júr.
Qazaqstan halqymyzdyń keleshektegi taǵdyryna tikeleı yqpal etetin aýqymdy jańǵyrý jolyna tústi. Jańa Halyq Konstıtýsııasy jobasynyń ózegi – elimizdiń Táýelsizdigi, egemendigi, aýmaqtyq tutastyǵy, azamattardyń múddeleri men quqyqtary.
Referendýmǵa shyǵarylǵan jańa Ata zańnyń jobasynda ana men balany qorǵaý, neke jáne otbasy ınstıtýtyn kúsheıtý máselelerine aıryqsha nazar aýdaryldy. Sondaı-aq halyqtyń ál-aýqatyn arttyrýǵa, qoǵamda zańdy qurmetteý, tabıǵatty aıalaý, ádildik, eńbekqorlyq, jaýapty jáne jasampaz otanshyldyq qaǵıdattaryn ornyqtyrýǵa basa mán berildi.
Áıelder qaýymy bolashaqta da ózderiniń adaldyǵymen, qarym-qabiletimen, erekshe kúsh-jigerimen Ádiletti, О́rkendegen Qazaqstandy qurýǵa belsene atsalysa beretinine kámil senemin.
Barshańyzǵa myqty densaýlyq, baq-bereke, tolaǵaı tabys tileımin!
