Finprom.kz zertteýine súıensek, 2026 jyldyń qańtarynda elimizde benzın men dızel baǵasy keıingi bir jyldaǵy eń joǵary deńgeıge jetken. Ulttyq statıstıka bıýrosynyń derekterine sáıkes, keń taralǵan benzın túrleri boıynsha tutyný baǵasynyń ındeksi 116,8% bolǵan. Al eń kóp qoldanylatyn AI-92 benzıni bir jyl ishinde 17%-ǵa qymbattaǵan. Dızel otynynyń baǵasy da ósip, 14,2%-ǵa artqan.
Bul ósim avtokólik ıeleri úshin kútpegen jańalyq bolǵan joq. О́tken jyldyń kúzinen bastap janarmaı baǵasynyń birtindep ósip kele jatqany baıqalǵan. Statıstıkaǵa qarasaq, byltyrǵy jyldyń basynan qyrkúıekke deıin benzın baǵasynyń ındeksi 101%-106% aralyǵynda bolǵan. Alaıda tamyz aıynan bastap baǵanyń ósý qarqyny kúsheıip, ındeks 108%-dan 116,8%-ǵa deıin jetken.
О́ńirler boıynsha baǵa ósimine kelsek, benzın baǵasynyń eń joǵary ósimi Pavlodar oblysynda tirkelgen. Munda ındeks 126,3% bolǵan. Odan keıin Astana – 120% kórsetkishimen ekinshi orynda tur. Al alǵashqy bestikke Abaı oblysy (117,6%), Almaty oblysy (117,1%) jáne Ulytaý oblysy (116,9%) kirgen.
Al baǵa eń az ósken óńir – Batys Qazaqstan oblysy, munda ındeks 112% ǵana bolǵan. Atyraý oblysynda – 113,1%, Mańǵystaý oblysynda – 113,9%. Ortalyq jáne ońtústik óńirlerde ósim salystyrmaly túrde ortasha deńgeıde qalyptasqan. Mysaly, Túrkistan oblysynda ındeks – 114,5%, Shymkentte – 115%, Qaraǵandy oblysynda – 115,1%.
Janarmaıdyń naqty baǵasyna kelsek, eń qymbat benzın iri qalalarda tirkelgen. Mysaly, el boıynsha AI-92 benzıniniń ortasha baǵasy 236 teńge bolsa, Astanada onyń lıtri 251 teńgeden satylǵan. Al AI-98 benzıniniń ortasha baǵasy 322 teńge bolǵanymen, Almatyda ol 355 teńgege deıin jetken.
Energetıka mınıstrligi benzın men gaz baǵasyna qatysty shaǵymdardy qabyldaıtyn jeli ashty
Basqa qalalarda jaǵdaı ártúrli. Jezqazǵanda AI-92 benzıni – 242 teńge, Taldyqorǵanda – 239 teńge. Al eń arzan baǵa Túrkistanda – 224 teńge, Atyraýda – 218 teńge deńgeıinde tirkelgen.
AI-95 jáne AI-96 benzıni boıynsha eń joǵary baǵa Almatyda – 317 teńge, Taldyqorǵanda – 314 teńge, Petropavlda – 308 teńge bolǵan. Al Aqtóbe men Atyraýda bul benzınniń baǵasy shamamen 280 teńge, ıaǵnı, ortasha deńgeıden tómen.
Foto: energyprom.kz
Dızel otynynyń eń joǵary baǵasy ortalyq óńirlerde baıqalǵan. Qystyq dızeldiń lıtri Qaraǵandyda – 666 teńge, Kókshetaýda – 628 teńge, Astanada – 614 teńge bolǵan. Al eń arzan dızel Qyzylordada – 491 teńge, Aqtaýda – 473 teńge deńgeıinde satylǵan.
Sarapshylardyń aıtýynsha, ótken jyldyń sońynda janarmaı baǵasynyń ósý qarqyny Eýrazııalyq ekonomıkalyq odaqtyń basqa elderine qaraǵanda joǵary bolǵan.
«Sońǵy aılarda janarmaı baǵasynyń ósýi tek ishki naryqtaǵy faktorlarmen ǵana baılanysty emes. Qazaqstandaǵy baǵa dınamıkasy EAEO elderindegi úrdistermen de astasyp jatyr. 2025 jyldyń jeltoqsanynda elimizde benzın baǵasynyń ındeksi 115,7% boldy. Bul EAEO boıynsha ortasha kórsetkishten (111,1%) áldeqaıda joǵary. Mundaı aıyrmashylyq janarmaı naryǵyndaǵy qysymnyń kúsheıgenin kórsetedi. Degenmen soǵan qaramastan Qazaqstanda janarmaı baǵasy kórshi eldermen salystyrǵanda áli de tómen deńgeıde qalyp otyr. Mysaly, Qazaqstanda benzınniń lıtri orta eseppen 0,5 dollar bolsa, Reseıde ol 0,8 dollar shamasynda, ıaǵnı 78,3% qymbat. Dızel otyny da Qazaqstanda arzan – shamamen 0,7 dollar, al Reseıde 1 dollar, bul 49,2% joǵary», deıdi zertteý avtorlary.
Sarapshylar taǵy bir mańyzdy máselege nazar aýdarady. Qazirgi salystyrmaly túrde tómen baǵa uzaqqa sozylmaýy múmkin.
«Qazirgi baǵa aıyrmashylyǵy uzaq merzimde saqtala bermeýi yqtımal. Sebebi 2027 jyldyń 1 qańtarynan bastap EAEO elderi arasynda munaı men munaı ónimderiniń ortaq naryǵyn qurý týraly kelisim kúshine enedi. Eger bul jospar tolyq júzege assa, Qazaqstandaǵy janarmaı baǵasy birtindep odaqtaǵy basqa elderdiń deńgeıine jaqyndaýy múmkin. Sondyqtan búgingi baǵa bolashaqtaǵy jaǵdaımen salystyrǵanda áldeqaıda tómen kórinýi yqtımal», dep atap ótedi sarapshylar.
