Bıe baılap, qymyz ashytqan fermer

Úmitqan Isahanovanyń bilimi orta bolsa da, qol qýsyryp bos otyrǵandy jany súımeıdi. Osydan biraz ýaqyt buryn alys-jaqyn shetelderden kıim-keshekter ákelip, onysyn turǵyndarǵa qoljetimdi baǵada saýdalap, ártúrli saýda-sattyqpen aınalysqan edi. Sóıtip, otbasyna kiris kirgizip, otaǵasyna edáýir kómekshi bolady. Biraq úsh jyl buryn aıaq astynan densaýlyǵy syr berip, dárigerler jumysqa jaramsyzsyń dep, úshinshi top múgedektigin beredi. Qur dárimen emdelgennen góri densaýlyǵyn saýyqtyrý úshin Úmitqanǵa dárigerler qymyz, saý­mal ishińiz dep keńes beredi. Memlekettiń jumysqa ja­ram­syzdyǵyna beriletin járdem­aqysy densaýlyǵyn túzeýge, kúnkóris jasaýyna jetkiliksiz ekenin baıqaǵan ol bos otyrýdy jón kórmeı, ózine bir kásippen aınalysý qajet dep sheshedi. Baıqap qarasańyz, eńbek etemin degen adamǵa eshqandaı da syltaý kerek emes eken. Oılana kele otaǵasymen jáne balalarymmen aqyldasyp, bıe ustap, qymyz óndirýdi josparlaıdy. Kez kelgen isti bastaý úshin qarajattyń qajettigi aıtpasada túsinikti edi. Osy jaǵdaıda «Jumyspen qamtý jol kartasy-2020» baǵdarlamasy paıdasyn tıgizdi dep eske alady Úmitqan. О́tken jyldyń naýryz aıynda Semeı qalasy ákimdiginiń jumyspen qamtý ortalyǵyna ótinish pen bıznes josparyn usynyp, tamyz aıynda bir mıllıon jeti júz myń teńge shaǵyn nesıe alady. Úmitqan apaıdyń úıinde bolyp, bal tatyǵan qymyzynan búginde talaılar dám tatqan. Sharýasy bul kúnderi dóńgelep, tabysty kásipkerge aınalǵan. Aıtýynsha, alǵash ret berilgen qarajatqa úsh qulyndy bıe, bir baıtal satyp alyp, qymyz óndirýdi bastaıdy. Saýylǵan sútti saýmal túrinde de, ashyǵan qymyz kúıinde de ózi paıdalanyp, artylǵanyn qajet etken turǵyndarǵa qoljetimdi baǵamen satýmen aınalysýda. Osy arqyly turǵyndarǵa jumys ornyn da ashyp otyr. Qymyz qasıetti sýsyn bolǵandyqtan asa tazalyqty, ashytý tehnologııasyn jiti saqtaýdy, ydystyń sapaly bolýyn jáne ýaqytynda ystap otyrýdy qajet etedi. Mine, osy talaptar oryndalǵandyqtan da, onyń ashytqan qymyzyna suranys kóptep túse bastaıdy. Bıe saýý da ońaı kásip emes. Kirgen kirisin jemshópke, malǵa qaraıtyn kómekshi adamnyń eńbegine jáne nesıeni der kezinde jabýǵa jumsap otyr. Endigi maqsaty saýylatyn bıelerdiń sanyn onǵa jetkizip, qosymsha jumys oryndaryn ashyp, turǵyndar suranystaryn tolyǵymen qamtamasyz etsem deıdi nesıe alýshy. Jumyspen qamtý ortaly­ǵynyń mamany Máýlit Qılybaev­tyń aıtýynsha, Elbasymyz bıylǵy Joldaýynda múmkindigi shekteýli adamdarǵa kóbirek kóńil bólý kerek, olar úshin Qa­zaqstan kedergisiz aımaqqa aına­lýy tıis dep tapsyrdy deıdi. Iаǵnı múmkindigi shekteýli adamdar turmystyq qyzmet kórse­týde, taǵam óndirýde, aýyl sharýashylyǵynda jumys is­teı alady delingen. Olaı bolsa Isahanovanyń aınalysyp otyrǵan kásibi osynyń dále­li retinde basqalarǵa úlgi bolar­lyqtaı is ekeni daýsyz. Raýshan NUǴMANBEKOVA. SEMEI.