Sheteldegiden esh kem emes

Oblys kásipkerleriniń forýmynda 10 memorandým men kelisimge qol qoıyldy

Elbasy otandyq ónimge basymdyq berý, qazaqstandyq úlesti arttyrý jaıyna únemi kóńil bólip keledi. Úkimettiń keńeıtilgen otyrysynda «Nurly Jol» baǵdarlamasyn júzege asyrý sheńberinde «Qazaqstanda jasalǵan!» aksııasy bastalatynyn málimdep, barsha azamattardy osy kúrdeli jaǵdaıda patrıot bolyp, otandyq ónimderdi satyp alýǵa shaqyrdy. Prezıdenttiń bas­tamasy Qyzyljar óńirinde de qyzý qoldaý taýyp, jer-jerlerde ótkizilgen sharalar barysynda qazaqstandyq azyq-túlik taǵamdary men taýarlarǵa úlken suranystyń bary ańǵaryldy. Igi is «Severnyı» gıpermarketinde bastaý alyp, oblysta shyǵarylatyn ónimderdiń moldyǵymen, baǵalardyń qol­jetimdiligimen erekshelendi. – «Fregat», «Leontev», «SBI-Agro», «Sharov», «Kazmıas­o­prodýkt», «Molprodýkt», «Maslo­del» sekildi syrtqy naryqqa da sapaly ónimder jóneltip júrgen taýar óndirýshilerimiz jurtshylyqqa árkez sapaly et, sút ónimderin usynady,– deıdi satýshy Oksana Ledneva. О́zimizde shyǵarylatyn ónim­derdiń ótimdi ekenin «Soltústik» áleýmettik- kásipkerlik korporasııa­sy uıymdastyrǵan kommýnaldyq azyq-túlik taýarlary jármeńkesi de anyq baıqatty. Tutynýshylardan «reseılik shujyqtardyń qospa­sy kóp bolatyndyqtan, birinshi kezekte óz ónimderimizdi tańdaımyz. Qostanaıdyń «Baıan Sulý» kámpıtteri táttiligimen til úıiredi. Balyq ta, jumyrtqa da, bal da, un da, jarma da ózimizdiki jáne anaǵurlym sapaly», degen jyly sózderdi jıi estidik. Elbasynyń Qazaqstanda jasalǵan ónimderge degen suranysty arttyrý jónindegi bastamasyna oraı aımaq basshysy Erik Sultanov óńir turǵyn­daryn otandyq ónimmen qamtamasyz etý barysyn baıqaý maqsatymen iri saýda oryndaryn aralap, suranystyń zor ekenine kóz jetkizdi. Al, M.Qozybaev atyndaǵy SQMÝ-diń májilis zalynda ótken oblys kásipkerleriniń «Qazaqstanda jasalǵan!» aımaq­tyq forýmyna «NADLoC» agent­tiginiń, Ulttyq kásipkerler palatasynyń, kompanııalardyń, holdıngterdiń, vedomstvolardyń, damý ınstıtýttarynyń ókilderi, kásiporyndardyń basshylary men jeke kásipkerler qatysty. Erik Hamzauly jınalǵandarǵa arnaǵan quttyqtaýynda Memleket basshysy otandyq taýar óndirisin damytý mindetin qoıǵanyn, barshamyz úshin qazaqstandyq úlesti arttyrý mańyzdy másele bolyp tabylatynyn atap kórsetti. Oblys ákiminiń orynbasary Erlan Áýkenov óńirde qazaqstandyq mazmundy qamtamasyz etý jáne kásipkerlikti damytý boıynsha atqarylyp jatqan jumystar jaıy­nda baıandady. Búginde saýda jelilerinde otandyq taýarlar seksııasy jumys isteıdi. О́ńirde óndiriletin taýarlardyń, jumystar men qyzmetterdiń sany men sapasyn arttyrýǵa baǵyttalǵan júıeli sharalar keńinen uıymdastyrylyp keledi. Nátıjesinde qoldaý tapqan jobalar sany 13,2 mıllıard teńgeni quraǵan. 5 zaýytqa 22 mıllıard teńgeniń tapsyrysy ornalastyrylǵan. 10 kásiporyn uzaq merzimdi kelisim jasasqan. Budan tysqary shaǵyn jáne orta bıznesti qoldaý maqsatymen jeke is-sharalar jospary qabyldanyp, 10 mıllıard teńge qarastyrylǵan. Qaıta jańǵyrý júrgizilgennen keıin «Molprodýkt» JShS óz ónimderin eksporttaı bastady. «Sultan» AQ 4 eldiń naryǵymen tyǵyz qarym-qatynas ornatqan. Úkimet tapsyrmasy boıynsha qytaılyq kompanııalarmen 6 jańa óndiris orny qurylady. Qazaqstandyq mazmundy qamtamasyz etýge taý-ken ornyn paıdalanýshylar da jumyldyrylady. Oǵan «Áýlıe gold maınıng» birlesken kompanııasyn mysalǵa keltirýge bolady. Bir jyldan artyq toqtap turǵan 9 óndiris orny qalpyna keltirilgen. Bıyl taǵy 13-i iske qosylady. Indýstrııalandyrý kartasynyń ekinshi besjyldyǵyna 23 mıllıard teńgeniń 26 jobasy engizilgen. Qurylys, energetıka, TKSh, kólik jáne avtojoldar salasynda 107 nysannyń jumysy jańǵyrtylady. Atqarylǵan pármendi jumystardyń arqasynda ótken jylǵa qaraǵanda qazaqstandyq mazmunnyń úlesi 34 paıyzdan 89 paıyzǵa deıin ulǵaıǵan. «Bıznestiń jol kartasy-2020» baǵdarlamasy aıasynda 200 joba paıdalanýǵa berilgen. Sońǵy eki aıda kásiporyndar 23 mıllıard teńgeniń ónimderin shyǵarǵan. 25 myńǵa jýyq kásip­kerlik sýbektilerine 110 myń adam tartylǵan. «NARMS «NADLoC» AQ basqar­masy tóraǵasynyń orynbasary Gúlmıra Ýahıtova jergilikti taý­ar óndirýshilerdi qoldaý sharalary týraly oılarymen bólisti. «QTJ»UK» AQ-tyń birinshi vıse-prezıdenti Baýyrjan Orynbasarov oblys kásiporyndarymen 7 mıllıard teńgeniń tapsyrysyna kelisim jasalǵanyn, ekinshi jartyjyldyqta 11 mılllıard teńgege jetkizý kózdelip otyrǵanyn jetkizdi. Plenarlyq otyrystan keıin ózara yntymaqtastyq týraly 10 kelisim men memorandýmǵa qol qoıyldy. О́mir ESQALI, «Egemen Qazaqstan». Soltústik Qazaqstan oblysy. Sýretti túsirgen Talǵat TÁNIBAEV.