Tutas el aýmaǵynan habar taratyp, táýelsiz baıqaýshylar men BAQ ókilderin toǵystyrǵan alańda referendým kúni bas-aıaǵy tórt brıfıng ótti. Shtabtyń tikeleı efıri tańǵy saǵat 7.00-de bastalyp, daýys berý aıaqtalyp, aldyn ala qorytyndylar jarııalanǵanǵa deıin 11 saǵat úzdiksiz tikeleı efır jalǵasty.
Eldegi eń iri megapolıste saıası naýqan belsendi bastalǵanyn aıtýymyz qajet. Dál osy kúni kámelettik jasqa endi aıaq basqan turǵyn men ǵasyr ǵumyrdy eńsergen keıýana da daýys berý alańynan tabyldy. Aqparattyq ashyqtyqty qamtamasyz etý maqsatynda uıymdastyrylǵan shtab jumysy keshke deıin tynǵan joq. Qoǵamdyq kommýnıkasııalar alańyna ár saǵat saıyn saıası sarapshylar men táýelsiz baıqaýshylar kelip referendýmnyń ótý barysy týraly tyń maǵlumatpen bólisip otyrdy. Daýys berý ýchaskeleri ashylǵan sátten bastap tikeleı qosylymdarǵa Almaty jáne Shymkent qalalary, sondaı-aq Jetisý, Soltústik Qazaqstan jáne Batys Qazaqstan oblystary (Oral qalasy) qosyldy. Keshke deıin ózge de óńirlermen baılanys ornady.
– Aqparattyq shtabtyń negizgi mindeti referendým barysy týraly qoǵamdy jedel ári naqty aqparatpen qamtamasyz etý, sondaı-aq múmkin bolatyn aqparattyq arandatýlar men jalǵan habarlamalardyń taralýyna jol bermeý boldy. BAQ ókilderimen birlese jumys isteı otyryp, jaýapty kezeńniń ár sátin oıdaǵydaı ótkizdik. Referendým barysyndaǵy jańalyqtar tikeleı efır arqyly turǵyndarǵa jedel jetip otyrdy, – deıdi «Independ.kz» aqparattyq agenttiginiń bas redaktory Rafael Gasanov.
Brıfıngke qatysýshylar Almaty turǵyndarynyń el ómirindegi mańyzdy saıası ýaqıǵaǵa ortasha belsendi úles qosqanyn, daýys berýshilerdiń legi tústen keıin qarqyn alǵanyn málimdedi. Qala aýmaǵynda barlyǵy 2 myńnan asa táýelsiz baıqaýshy referendýmnyń ár sátin qalt jibermeı qadaǵalaǵan bolsa, shahardyń barlyq aýdanynan 80-ge tarta maman sońǵy aqparattardy jedel shtabqa joldap otyrdy.
– Bizdiń 1 308 táýelsiz baıqaýshymyz ýchaskelerde jumys istedi. Sonymen qatar 654 kapıtan baqylaý úderisin úılestirdi. Buǵan qosa mobıldi toptar da boldy. Baqylaý barysynda qandaı da bir zańǵa tompaq áreket tirkelgen joq, – dedi brıfıngke qatysqan Aýǵan ardagerleri úılestirý keńesiniń múshesi Maqsat Mamadııarov.
«Er Azamat» qoǵamdyq birlestiginiń ókili Alına Kan daýys berý úderisiniń bel ortasynda júrgen baıqaýshylardan saǵat saıyn aqparat alyp otyrǵanyn, referendýmǵa daıyndyq kezeńinde baıqaýshylardyń biliktiligin arttyrý baǵytyndaǵy jumys júıeli júrgizilgenin, olar referendým aıaqtalyp, daýystardy sanaý kezinde de sonda bolǵanyn atap ótti.
Sondaı-aq qoǵam qaıratkeri Andreı Andreev qoǵamnyń saıası belsendiligi men azamattyq jaýapkershiligi artqanyn, referendým barysynyń ashyqtyǵy barynsha saqtalǵanyn jetkizdi.
Daýys berý úderisi aıaqtalǵannan keıin táýelsiz baıqaýshylardyń Aqparattyq shtabynyń qorytyndy brıfıngi ótti. Shtabqa 30-dan asa táýelsiz jýrnalıst tartylǵan. Efır barysy men jedel qosylymdardy mıllıonnan asa paıdalanýshy tamashalaǵan bolsa, shtab alańynan taraǵan málimetter 20-dan asa buqaralyq aqparat quralynda jarııalandy.
Shtab ókilderiniń aıtýynsha, qoǵamdyq-saıası úderister týraly osyndaı jedel aqparat berý formaty ashyqtyqty arttyryp, qoǵammen erkin dıalog ornatý múmkindikterin keńeıtýge yqpal etedi.
ALMATY
