Bıylǵy merekeniń basty ereksheligi – sıfrlyq tehnologııalar men jasandy ıntellekt múmkindikteriniń keńinen qoldanylýy. Memleket basshysy jarııalaǵan Sıfrlandyrý jáne jasandy ıntellekt jyly aıasynda elordada ınteraktıvti alańdar qurylyp, qala turǵyndary men qonaqtaryna robottar men zamanaýı tehnologııalardyń kórsetilimderi usynylady. Bul bastama ulttyq dástúr men jańa tehnologııanyń sabaqtastyǵyn aıqyn kórsetýdi kózdeıdi.
Shańyraq kúni aıasynda mádenı jáne sporttyq is-sharalar da Astana qalasynda keńinen uıymdastyrylyp otyr. Máselen, Mýzykalyq jas kórermen teatry «Baqytty shańyraq jyry» atty kesh ótkizip, otbasylyq juptardyń ónerin kópshilikke usynady. J. Úshkempirov atyndaǵy Jekpe-jek saraıynda mektep oqýshylary arasynda aýqymdy fleshmob pen «Altyn asyq» ulttyq oıyny ótedi.
Joǵary oqý oryndary da merekelik baǵdarlamaǵa belsendi qatysyp jatyr. S. Seıfýllın atyndaǵy agrotehnıkalyq ýnıversıtet «Shańyraq qurý – dástúr jalǵasy» rásimin kórsetse, L.N. Gýmılev atyndaǵy Eýrazııa ulttyq ýnıversıteti jas otbasylar arasynda «Otbasy – baqyt mekeni» ulttyq sport estafetasyn uıymdastyrady. Al Ál-Farabı atyndaǵy Oqýshylar saraıynda «Aq bata» baıqaýy ótedi.
Merekelik kúnniń mazmuny otbasy qundylyǵyn dáripteýge baǵyttalǵan. Kópbalaly analarǵa «Kúmis alqa» jáne «Altyn alqa» tósbelgileri tabystalady. Sonymen qatar jańa týǵan sábılerge ulttyq úlgidegi besikter syıǵa tartylyp, otbasylyq ómiriniń 50 jyldyǵyn atap ótken juptarǵa qurmet kórsetiledi. «Shańyraq – otbasynyń berekesi» chellendji de osy kúnniń negizgi bastamalarynyń biri retinde josparlanǵan.
Osylaısha, Shańyraq kúni elordada dástúr men jańashyldyqty ushtastyra otyryp, otbasy ınstıtýtynyń qoǵamdaǵy mańyzyn aıshyqtaıtyn mazmundy merekege aınalyp otyr.
