Onyń ustalǵany týraly habar Telegram jelisindegi Kozachkov offside arnasynda jarııalandy.
«Keshe túnde Almatyda «QazTAG» aqparat agenttiginiń ıesi Áset Mataev ustaldy. Meniń qolymdaǵy derek boıynsha, ol buzaqylyq jasady degen kúdikke ilingen», delingen jazbada.
Polısııa oqıǵanyń mán-jaıyn túsindire kele, keshe túnde Almaty qalasy Medeý aýdanynda er adamdar arasynda «buzaqylyqqa ulasqan» janjal bolǵanyn rastady.
«Aldyn ala málimet boıynsha, oqıǵaǵa qatysy bar azamattar M. men R. alkogolge mas kúıde oıyn-saýyq mekemesinen shyqqannan keıin janjaldasyp qalǵan, onyń sońy tóbeleske ulasqan.
Polısııa qyzmetkerleri oqıǵaǵa qatysy bardyń bárin ustap, polısııa bólimine jetkizdi. Buzaqylyq boıynsha qylmystyq is qozǵaldy.
Qazirgi ýaqytta tergep-tekserý sharalary júrgizilýde. Árqaısysynyń áreketi zańdyq turǵyda baǵalanady. Al polısııanyń prınsıpke saı ustanymy – kez kelgen agressııa men qoǵamdyq tártipsizdikti, ásirese mas kúıde jasalǵan áreketterdi qatań toqtatý», dedi departament ókili.
Aıta keteıik, buǵan deıin Almaty qalasynda qylmystyq is aıasynda qoǵam belsendisi Sanjar Boqaev ustalǵanyn habarlaǵan edik.
