Sýretti túsirgen – Igor BÝRGANDINOV
Roza Baǵlanova atyndaǵy «Qazaqkonsert» memlekettik akademııalyq konserttik uıymynyń sahnasy dál osy keshte tek konsert alańy ǵana emes, ulttyq rýh pen kórkem sezimniń qasıetti ordasyna aınaldy.
Kesh baǵdarlamasynda oryndalǵan «Alash eli», «Tósbulaq» kúı-poemalary tyńdarmandy tereń tolǵanysqa jetelep, ótken men búgindi jalǵaǵan rýhanı kópirge aınaldy. Al «Áke», «Aqqýym bolyp oraldyń ba?», «Juldyz – ǵumyr», «Aman bolshy, jan ana», «Baqyt valsi», «Mahabbat valsi», «Qazaq eli» syndy ánder – adam janynyń eń názik pernelerin dóp basqan týyndylar. Bir ánde – ákeniń asqaq tulǵasy men saǵynyshqa toly beınesi, birinde – ananyń meıirimi men sheksiz mahabbaty, endi birinde – ǵumyrdyń ótkinshiligi men ómirdiń máni, taǵy birinde – elge degen perzenttik súıispenshilik pen maqtanysh sezimi óriledi. Atalǵan týyndylar tek mýzykalyq shyǵarma ǵana emes, olar – ómirdiń kórkem shejiresi, jannyń aınasy.
Kompozıtor shyǵarmashylyǵynyń basty ereksheligi – ulttyq dástúrdiń tereń tamyry men zamanaýı mýzykalyq tildiń tabıǵı úılesiminde. Ol kúıdi jańa qyrynan sóıletti, ánge jańa tynys berdi, áýendi sezimge aınaldyrdy. Sonyń arqasynda sazger týyndylary ýaqytpen birge jańǵyryp, tyńdarman júreginen oryn alyp keledi.
Sahna tórinde óner kórsetken sańlaqtar keshtiń mazmunyn baıyta tústi. Halyqaralyq baıqaýlardyń laýreaty Medet Esbergenov, «Kúreńbel» trıosy, sondaı-aq Jomart Tákebaev, Maqsat Nurlanov, Talǵat Orazaev, Tolqyn Sqaqova, Saltanat Muratqyzy, Shahzod Sana, Sáýle Álimbetova, Arýjan Jalǵasova, Jibek Músirǵalıeva syndy ónerpazdar kórermenmen shynaıy mýzykalyq suhbat qurdy. Dánesh Raqyshev atyndaǵy Jetisý oblystyq fılarmonııasynyń estradalyq-sımfonııalyq orkestri ár týyndyǵa aıryqsha boıaý berip, keshtiń kórkemdik deńgeıin asqaqtatty.
Aıtýly konsert tek mereıtoılyq esep emes, kóktemmen birge jańarǵan rýhtyń, ónerge degen ińkárliktiń, ulttyq muraǵa degen qurmettiń kórinisi boldy. Mýzyka aıaqtalǵanymen, áseri uzaq saqtaldy. Sebebi Álı Alpysbaevtyń áýenderi – ýaqytpen úndesken, júrekpen seziletin, halyqpen birge jasaıtyn qundy mura. Osylaısha, Naýryz meıramyna aıryqsha sán bergen syrshyl konsert jandy terbegen áýenniń, jańarǵan ómirdiń, máńgilik ónerdiń jarqyn rámizine aınaldy.
