Kóktemde keletin jyl qustaryna qamqorlyq jasaýǵa jastardyń ynta-yqylasy artyp keledi. Bul bastamaǵa bilek sybana kirisý aınymas dástúrge aınala bastaǵany aqıqat. О́ıtkeni óńirde qanattylarǵa uıa jasaý sharasy alǵash ret ótken jyly bastaý alyp, jan jadyratarlyq sharýa bıyl da jalǵasyn taýyp otyr.
Jastardyń ekologııalyq mádenıetin qalyptastyrýǵa, qustarǵa qamqorlyq jasaýǵa, tabıǵatty aıalaýǵa baýlýdy maqsat etken aksııa barysynda qolyna aǵashyn, balǵa-shegesin alyp, uıa jasaýǵa kirisken Qonaev qalasyndaǵy Shoqan Ýálıhanov atyndaǵy №2 gımnazııanyń oqýshylary jumysyn tez arada aıaqtap, jańa ári ádemi uıalaryn aǵash bastaryna óz qoldarymen ornatty.
Qorshaǵan ortany qorǵaý – ár adamnyń mindeti ekenin aıtqan gımnazııa oqýshysy Álimjan Turdalıev synyptastarymen birge qustarǵa qamqorlyq jasaýǵa atsalysqanyna rızashylyǵyn bildirdi.
«Kóktemmen birge týǵan ólkege qaıta oralǵan qustarǵa qamqorlyq etý – qorshaǵan ortaǵa degen jaýapkershiliktiń aıqyn kórinisi. Elimizde mundaı aýqymdy aksııa ótken jyly alǵash ret Almaty oblysynda ótkizildi. Sol kezde myńǵa jýyq qus uıasy daıyndalyp, arnaıy oryndarǵa ornatyldy. Bıyl bul kórsetkish odan da joǵary. Bastama óskeleń urpaqty tabıǵatty qorǵaýǵa, meıirimdilik pen izgilikke tárbıeleıdi. Aksııa oblystyń barlyq aýdany men qalasynda sáýir aıynyń sońyna deıin jalǵasady», deıdi oblystyq Jastar resýrstyq ortalyǵynyń dırektory Maqsat Keneshov.
Almaty oblysy
