Foto: Ashyq derekkóz
Mádenıet jáne aqparat mınıstrliginiń málimetinshe, búginde el kóleminde 70-ten astam teatr jumys isteıdi, onyń ishinde 57-si – memlekettik teatrlar. Olardyń 11-i respýblıkalyq, al 46-sy óńirlik deńgeıde qyzmet etedi. Bul derekter teatrdyń ulttyq mádenı keńistiktegi orny aıryqsha ekenin kórsetedi.
Saladaǵy serpin ótken jyldyń qorytyndysynan da anyq baıqalady. 2025 jyly memlekettik teatrlarda 410 jańa qoıylym sahnalandy. Sonymen qatar, teatr ujymdary 539 gastroldik sapar uıymdastyrdy, onyń 495-i el ishinde, al 44-i shetelde ótti. Jyl qorytyndysynda 16 myń qoıylym kórermenge jol tartsa, olardy 2 832 835 adam tamashalaǵan.
Teatrlardyń shyǵarmashylyq tabysy halyqaralyq jáne respýblıkalyq deńgeıdegi baıqaýlarda da kórinis tapty. Byltyr otandyq teatr qaıratkerleri 101 halyqaralyq jáne 90 respýblıkalyq festıval men baıqaýǵa qatysyp, nátıjesinde 13 qoıylym «Gran-prı» jáne «Eń úzdik spektakl» atalymdaryn ıelendi.
Al bıylǵy jyldyń alǵashqy úsh aıynyń ózinde-aq oń dınamıka saqtalyp otyr. 2026 jyldyń birinshi toqsanynda respýblıkalyq teatrlarǵa 170 927 kórermen kelgen. Bul – teatrǵa degen qyzyǵýshylyqtyń báseńdemegenin, kerisinshe, turaqty túrde ósip kele jatqanyn bildiredi.
Jyl basynan beri sahnaǵa jol tartqan jańa qoıylymdar da kórermen yqylasyna bólenip úlgerdi. Olardyń qatarynda «Qorǵansyz», «Qazaqı komedııa nemese Bonaparttyń úılenýi», «Sholpannyń kúnási» spektaklderi bar.
Áýezov teatrynyń júz jyldyq tarıhynan syr shertetin qundy derekter jarııalandy
Dúnıejúzilik teatr kúnine oraı el teatrlarynda birqatar mańyzdy mádenı sharalar josparlanǵan. Atap aıtqanda, «Astana Balet» teatrynda «Bolero H» baletiniń premerasy, Mıhaıl Lermontov atyndaǵy teatrda «Jenıtba (sovershenno neveroıatnoe snovıdenıe)» komedııasy, Quddys Qojamııarov atyndaǵy Uıǵyr mýzykalyq komedııa teatrynda «Býnt nevestok» («Kelinder kóterilisi») spektakli sahnalanady. Sonymen qatar, «Altyn Saqa – 2026» jańa qoıylymdar festıvali men Ǵabıt Músirepov atyndaǵy teatrdaǵy «Teatr túni» sharasy kórermenge erekshe tartý bolmaq.
Teatr – tek óner ordasy ǵana emes, qoǵamnyń rýhanı aınasy. Qoıylym sapasy men kórermen sanynyń artýy – ulttyq mádenıettiń jańǵyryp, jańa beleske kóterilip kele jatqanyn bildiredi.
