Oqý-aǵartý vıse-mınıstri Jaıyq Sharabasovtyń aıtýynsha, úsh jyldyń ishinde halyqaralyq standarttarǵa saı keletin 460 myń oqýshy ornyna arnalǵan 217 jańa formattaǵy mektep salyndy. Onyń ishinde 105 mektep 2024 jyly, 112 mektep 2025 jyly paıdalanýǵa berilgen. Jobany iske asyrý nátıjesinde 52 úsh aýysymdy, 12 apatty mektep máselesi sheshilip, 100-den astam mekteptegi oryn tapshylyǵy qysqarǵan.
Barlyq nysan biryńǵaı standartpen salynǵan. Onyń ishinde 87 mektep aýyldyq jerlerde ornalasqan. Bul qala men aýyl mektepteri arasyndaǵy alshaqtyqty aıtarlyqtaı azaıtty. Sonymen qatar mektepterdiń aýdany burynǵy tıptik jobalarmen salystyrǵanda orta eseppen 15–20 paıyzǵa ulǵaıyp, tehnıkalyq jabdyqtalý deńgeıi tórt eseden astam joǵarylaǵan.
Jobany iske asyrýǵa shamamen 30 memlekettik organ men uıym, onyń ishinde 20 óńirdiń ákimdigi qatysqan. Qurylys jumysy eki mehanızm arqyly júzege asyryldy. Atap aıtqanda, 208 mektep «Samruk-Kazyna Construction» AQ arqyly «kiltpen tapsyrý» formatynda salynsa, 9 mektep jergilikti atqarýshy organdardyń daıyn nysandardy satyp alýy arqyly iske asyrylǵan.
«Jańa formattaǵy mektepter zamanaýı pándik kabınetterimen, STEM-zerthanalarymen, robottehnıka kabınetterimen, sondaı-aq shyǵarmashylyq ortalyqtar, sheberhanalarmen jabdyqtalǵan. Oqý keńistikteri ár oqýshyǵa arnalǵan jeke shkaf pen jyljymaly partalar, aýyzsý fontandarymen qamtamasyz etilgen. Sonymen qatar fızıkalyq belsendilikti damytýǵa erekshe nazar aýdarylǵan, ıaǵnı 2–4 sport zaldary men fýtbol, basketbol, voleıbol, vorkaýt alańdary bar. Soltústik aımaqtardaǵy klımattyq jaǵdaılardy eskere otyryp hokkeı, al ońtústikte tennıs alańdary salynǵan», dedi Jaıyq Sharabasov.
Vıse-mınıstrdiń aıtýynsha, qurylys barysynda negizinen otandyq óndiristiń zamanaýı materıaldary qoldanylyp, ulttyq ekonomıka men óńdeýshi ónerkásiptiń damýyna oń áserin tıgizgen. Nysandardyń sapasyn qamtamasyz etý maqsatynda qurylys konstrýksııalaryna 5 jyl, jabdyqtar men jıhazdarǵa 3 jyl kepildik merzimderi belgilengen. Bul mektepterdiń sapaly, uzaqmerzimdi bolýyn qamtamasyz etedi.
Oqý-aǵartý vıse-mınıstri Shynar Aqparovanyń aıtýynsha, 217 mekteptiń 183-inde oqý úderisi uıymdastyrylǵan. Bul mektepterde 218 myńǵa jýyq oqýshy bilim alyp, 17 myńǵa jýyq pedagog eńbek etip jatyr.
«Mektep sapasynyń negizgi faktory – ony basqarý. Osyǵan baılanysty basqarý júıesin kúsheıtýge basymdyq berdik. Búginde 183 dırektor men 800-den astam dırektor orynbasarynan turatyn basqarý korpýsy qalyptasty. Bul quramda tájirıbeli basshylarmen qatar, jańa býyn kóshbasshylar da bar. Búginde «Keleshek mektepterin» basqarýdyń biryńǵaı, ortalyqtandyrylǵan modeli engizildi. Jobanyń operatory retinde Y.Altynsarın atyndaǵy Ulttyq bilim akademııasy belgilendi. Akademııa quramynda Ǵylymı-ádistemelik súıemeldeý ortalyǵy jumys isteıdi. Bul ortalyq oqý-tárbıe úderisin ádisnamalyq jáne mazmundyq súıemeldeýdi, sıfrlandyrý jumysyn úılestirýdi, kadrlyq irikteýdi, pedagogterdiń kásibı damýyn, bilim sapasyn taldaýdy júzege asyrady. Al jergilikti atqarýshy organdardyń quzyretinde ınfraqurylym, materıaldyq-tehnıkalyq baza jáne qarjylandyrý máseleleri saqtalady. Iаǵnı resýrstyq qamtamasyz etý óńirlerde, al bilim sapasyn basqarý ulttyq deńgeıde júzege asyrylady», dedi Shynar Aqparova.
