Sýret: mofa.go.jp
Japonııa elshiliginde ótken jıynda Japonııanyń elimizdegi Tótenshe jáne ókiletti elshisi Iıdjıma Iаsýmasa Astana qalasynyń №1 kópsalaly qalalyq aýrýhanasy men Eńbekshiqazaq kópbeıindi ortalyq aýdandyq aýrýhanasynyń ókilderimen granttyq kelisimshartqa qol qoıdy. Kelimsimsharttyń jalpy somasy – 85,224 dollar.
Elshi qarjylaı qoldaýǵa ıe bolǵan medısına ortalyqtarynyń ókilderin quttyqtaı otyryp, árbir joba medısınalyq qyzmetterdiń sapasyn arttyryp, adamnyń ómirin saqtaýda eleýli úlesi qosatynyna senim bildirdi. Uıym ókilderi de Japonııa úkimetiniń qazaq halqyna kórsetip jatqan qoldaýy úshin alǵysyn jetkizdi.
Uıym ókilderiniń aıtýynsha, granttyq qarjyǵa Astana qalasynyń №1 kópsalaly qalalyq aýrýhanasy shamamen 51,025 dollardy quraıtyn 7 pasıent monıtoryn, al Eńbekshiqazaq kópbeıindi ortalyq aýdandyq aýrýhanasy 32 kreatının analızatoryn (bastapqy jıyntyǵymen qosa) satyp alýdy josparlap otyr.
Aıta ketsek, Kúnshyǵys eli úkimetiniń «KUSANONE» baǵdarlamasy – adam qaýipsizdigin qamtamasyz etý jónindegi shaǵyn aýqymdaǵy áleýmettik jobalarǵa qaıtarymsyz kómegi. Granttyq qoldaý halyqtyń qarapaıym toptaryna járdemdesip, olardyń qaýipsizdigin qamtamasyz etýge úlesin qosady. Baǵdarlamaǵa jergilikti bılik organdary, medısına, bilim mekemeleri, úkimettik emes uıymdar, qoǵamdyq qorlar qatysa alady. Joba densaýlyq saqtaý, bilim, áleýmettik qamtamasyz etý, ekologııa, qorshaǵan ortany qorǵaý, kedeılikpen kúres, t.b. salalarǵa arnalǵan. Atalǵan baǵdarlama elimizde 1997 jyldan beri júzege asyrylyp keledi.
