Kórmeni respýblıkamyzǵa tanymal, ulttyq qolóner zattaryn kópshilikke nasıhattap júrgen qarasaılyq Bekdaıyr áýletiniń ulttyq reńktegi oıý-órnekpen naqyshtalǵan týyndylary qurady. Qolóner sheberleri О́zbekáli Jánibektiń 90 jyldyǵyna arnalǵan ulttyq kıim baıqaýynyń, «Mereıli otbasy» ulttyq baıqaýynyń jeńimpazdary atanǵan.
Bekdaıyr otbasynyń ulttyq naqyshtaǵy týyndylaryn tamashalaýǵa kelgen Á.Buqarbaıqyzy atyndaǵy, Qarasaı batyr atyndaǵy orta mekteptiń joǵarǵy synyp oqýshylarynyń nazaryna ulttyq qundylyǵymyz otbasylyq mádenıetten bastaý alyp, halqymyzdyń baıyrǵy tarıhymen astasyp jatqany baıandaldy. Tarıhı kezeńderden búginge jetken ulttyq kıimderimiz ben qolóner týyndylary – halqymyzdyń rýhanı murasy. Kóz tartarlyq kórmege qoıylǵan jádigerlerdiń avtorlary Qazaqstannyń eńbek sińirgen mádenıet qyzmetkeri, Sýretshiler odaǵynyń múshesi Qońyr Egenuly men jary Anargúl Narbotanova ulttyq oıý-órnekpen ádiptelgen kıim kııý arqyly ótkendi qurmettep, keleshek urpaqqa úlgi-ónege kórsetetinin atap ótti. Árbir kıimde kóneden jetken taǵylym, dástúr men danalyqtyń syr-qupııalary baryn jas óskinniń esine saldy.
Zamanaýı tehnologııalar jetistigin paıdalana otyryp, óskeleń jastyń talǵamyna oń áser beretin, tipti, qyzdardyń qyzyǵýshylyǵyn oıatqan áshekeı syrǵa, saqına, alqa, bilezik, shashbaý, kóz jaýyn alar shekeliktiń túr-túri kórmeden oryn tapty. Qazaq tarıhynyń baıyrǵy qundy jádigeri jartas sýretterindegi aıshyqty beıneler, oıý-órnek úlgileri sonaý qola dáýiri kezeńnen qalǵan qundylyqtarymyz mata, jún men kıiz úlgilerinen daıyndalǵan kıim-keshek týyndylaryn ıaǵnı, kolleksııalyq toptamasyn joǵarǵy synyp oqýshylary óz qalaýyna qaraı kıip, jastar talǵamyndaǵy sán kórsetilimin jasady.
«Tarıhı oryndar, tarıhı eskertkishter men mádenı qundylyqtardyń qorǵalýy bolsyn barlyǵy da ulttyq tárbıe quraly retinde aǵartýshylyq jáne bilim berý aıasyndaǵy nasıhattalý ádisteri memleketimizdiń tarıhı rólin kórsetedi. Ortalyqtyń úlken ekranynda sonaý qola dáýirinen bastaý alatyn baıyrǵy tarıhymyzben sabaqtasa úndesken Qazaq ulysynyń tarıhy qysqasha baıandaldy. Kórme jumysynyń basty maqsaty – osynaý tarıhı kezeńderdiń ózara sabaqtastyǵyn kórsetý», deıdi «Atameken» ortalyǵynyń aǵa ǵylymı qyzmetkeri Ábý Alpamys.
Almaty oblysy
