Ertis-Baıan óńirinde qatarynan birneshe kún soqqan aq tútek boran talaı jolaýshynyń saparyn bógep, jol qozǵalysyn qıyndatty. Osyndaı syn saǵattarda úlken joldar boıynda turyp qalǵan kólikterge kómekke kelip, at qulaǵy kórinbeıtin boranda jolaýshylardyń aman jetýine jaǵdaı jasaǵan Marııa Bedrınanyń áreketin kópshilik erlikke balap otyr. Ol Aqsý men Pavlodar qalalary arasyndaǵy avtojolda turyp qalǵan kólikterdiń aldyna shyǵyp, tórt shaqyrym boıy jaıaý júrip otyrǵan. Sonyń nátıjesinde adamdar Pavlodar qalasynyń irgesindegi Atameken kentine aman-esen jetken.
Marııa Nıkolaevnanyń jurtty súısintken bul isi qazir áleýmettik jelide tarap jatyr. Al qaısar jan óz áreketin erlik dep oılamaıdy.
«Bul kúni otbasymyzben Aqsý qalasynan úıimizge oralyp kele jatqan edik. Tereńkól aýdanynyń ortalyǵynda turamyz. Kólik rýlinde kúıeýim boldy. Saǵat kúndizgi úsh-tórtterdiń shamasynda Aqsýdan uzaı bergende aýa raıy kúrt buzylyp, aq tútek boran bastalyp ketti. Jol múlde kórinbeı qalǵan soń, jıekke túsip ketemiz be dep qoryqqan kólikter birinen soń biri toqtaı bastady. Sol sátte eń bastysy Atameken kentine jetýimiz kerek ekenin, turyp qalsaq kólikterimizdi qar basyp qalatynyn túsindim de, kólikten shyǵyp alǵa qaraı júre berdim. Sóıtsem bizdiń aldymyzda shamamen alty kólik tur, onyń úsheýi joldyń eki jolaǵyn da jaýyp qalypty. Arly-berli kólikterdiń ótýi múmkin emes. Bireý jol bastaýy kerek boldy. Al joldasym jaıaý júrgennen góri ózin rýlde senimdirek sezinedi. Sondyqtan alǵa shyqtym da, alǵashqy turǵan kóliktiń terezesin toqyldatyp, sońymnan er dep belgi berdim», deıdi ol.
Osylaısha, ol birde toqtap, birde alǵa jyljıdy. Kún sál ashylǵan sátte avtokerýenniń basynda kele jatqan ózge áıel adamnyń kóligine jaıǵasyp, jylynyp otyrǵan. Shamamen tórt shaqyrym joldy basyp ótkende Atameken kentine kireberistegi kópirge jetedi.
«Men úshin eń bastysy bul kúni úıge aman-esen jetý edi. Úıde balalarymyz kútip otyrǵan. Salonda bizben birge qyzym boldy, onyń ómirine de alańdadym. Onyń ústine kolonnanyń aldyndaǵy kólikti basqaryp kele jatqan áıel adamnyń boıyndaǵy úreıin basqym keldi. Meni kórip, júregi ornyna tústi. Eń qyzyǵy, mende qorqynysh degen múlde bolǵan joq. Áli aıaz tura qoımaǵan ýaqyt edi, jaýraǵan da joqpyn», dep qosty Marııa Nıkolaevna.
Marııa Bedrınanyń jasy 49-da. Búginde Tereńkól aýdanyna qarasty Peschan №1 mektebinde matematıka men ınformatıka pánderinen sabaq berip júr. Bilim salasyndaǵy jalpy eńbek ótili 25 jyldan asady. Kúıeýi ekeýi otbasynda úsh bala tárbıelep otyr.
Pavlodar oblysy
