Aqtaý qalasynda halyqaralyq standarttarǵa saı salynǵan olımpıadalyq úlgidegi nysan eki qabatty ǵımarattan turady. Munda muzaıdyny, sportshylarǵa arnalǵan kıim aýystyrý bólmeleri, jattyqtyrýshylar kabınetteri, ákimshilik bólmeler, kelýshilerge arnalǵan kafe qarastyrylǵan, sportshylar men qonaqtarǵa barlyq qajetti jaǵdaı jasalǵan.
Sport kesheniniń ashylý saltanatynda sóz sóılegen óńir basshysy Nurdáýlet Qılybaı:
«Jastardyń sportpen júıeli túrde aınalysýyna jan-jaqty jaǵdaı jasaý – bizdiń basty basymdyqtarymyzdyń biri. Memleket basshysy Qasym-Jomart Toqaev atap ótkendeı, buqaralyq sportty damytý, zamanaýı sport ınfraqurylymyn qalyptastyrý – strategııalyq mańyzdy mindetter. Osy oraıda buqaralyq sportty damytýǵa erekshe kóńil bólý qajet. Ásirese qysqy sport túrlerin jastar arasynda keńinen nasıhattaý asa mańyzdy. Mundaı bastamalar óskeleń urpaqtyń qyzyǵýshylyǵyn arttyryp qana qoımaı, olardyń áleýetin ashýǵa múmkindik beredi. Bolashaqta oblysymyzdan olımpıada chempıondary shyǵady dep senemin», dep atap ótti.
Memleket basshysy jeke ınvestorlardyń qoǵamdyq mańyzy bar jobalarǵa, onyń ishinde sport nysandaryn salýǵa qarjy salýǵa tıis ekendigin aıtqan bolatyn. Osy tapsyrmaǵa sáıkes jańa muz saraıy jeke ınvestısııa esebinen júzege asqan joba bolýymen erekshe, ári Mańǵystaýda bıznestiń áleýmettik ınfraqurylymdy damytýǵa qalaı qatysatynyna mysal bola alady. «Baýyrjan LTD» JShS dırektory, kásipker Ulyqpan Kóbesovtiń bul jobasy «Damý» qory arqyly júzege asyrylatyn «О́rleý» baǵdarlamasy aıasynda memlekettik qoldaýǵa ıe boldy.
Muz saraıynyń ashylý saltanatyna mánerlep syrǵanaýdan halyqaralyq dárejedegi sport sheberi, elimizdiń bes dúrkin chempıony, Jańaózen qalasynyń týmasy Gaýhar Naýryzova, shaıbaly hokkeıden halyqaralyq dárejedegi sport sheberi, Mańǵystaý oblysynyń bas jattyqtyrýshysy Dmıtrıı Shahov, sondaı-aq Sankt-Peterbýrgten arnaıy shaqyrylǵan jattyqtyrýshy – mánerlep syrǵanaýdan sport sheberligine kandıdat, Mańǵystaý oblysynyń aǵa jattyqtyrýshysy Alena Pankratova qatysty.
Ulttyq quramanyń múshesi, elimizdiń namysyn halyqaralyq arenada qorǵap júrgen sportshy, el chempıony, halyqaralyq jarystardyń júldegeri, Tórt qurlyq chempıonatynyń, álem chempıonatynyń, Azııa oıyndarynyń, qysqy Ýnıversıadanyń qatysýshysy, seriktesimen birge ISU halyqaralyq reıtınginde úzdik 50 juptyń qataryna engen Gaýhar Naýryzova týǵan ólkesinde jańa sport nysanynyń ashylýyna rızashylyǵyn bildirip, nysannyń jastardy salamatty ómir salty turǵysynda damytýǵa tıgizetin yqpalyn, bolashaq chempıondardy tárbıeleýdegi mán-mańyzyn atap ótti.
«Bizdiń qalada mánerlep syrǵanaý óneri áli bastapqy deńgeıde. Degenmen jańa muzaıdynynyń ashylýymen bul tamasha sport túri qarqyndy damyp, batyl da talantty balalardy ózine tartatynyna senimdimin. Jasóspirimder bul sportta baǵyn synaýdan qoryqpaı, tabandylyq tanytyp, tuǵyrdyń bıiginen kórinedi dep úmittenemin. Zamanaýı záýlim saraıda olarǵa barlyq múmkindik bar. Muzaıdynynyń ashylýy – úlken oqıǵa, ólkem úshin maqtanamyn, barsha sportshylarymyzǵa úlken jetistikter tileımin», dedi, qazirgi ýaqytta Ispanııada belgili sportshylar, Olımpııa oıyndarynyń qatysýshylary, Gran-prı kezeńderiniń júldegerleri Kırıll Halıavın men Sara Ýrtadonyń jetekshiligimen jattyǵyp júrgen sportshy G.Naýryzova.
Shynynda da, Aqtaýda ashylǵan muzaıdyny saraıy óńirdiń sport salasyndaǵy úlken jańalyq boldy. Mańǵystaý óńiriniń sporttyq ınfraqurylymyn damytýdaǵy mańyzdy nysan jas sportshylardy kásibı daıarlaýǵa jol ashady. Olımpıadalyq sporttyń hokkeı, mánerlep syrǵanaý, short-trek, kıorlıng sııaqty tórt túrin damytýǵa múmkindik beretin nysanǵa Astana, О́skemen, Qaraǵandy qalalarynan bilikti jattyqtyrýshylardy tartý josparlanyp otyr. Negizgi basymdyq hokkeı men mánerlep syrǵanaýǵa beriledi.
Nysannyń ashylýy Mańǵystaý oblysynda qysqy sport túrlerin damytýǵa, jas sportshylardy qoldaýǵa, buqaralyq sportty nasıhattaýǵa tyń serpin beretini sózsiz.
Mańǵystaý oblysy
