Qyzyq bolǵanda, jas startapshynyń IT-salasyna qyzyǵýshylyǵy shahmattan bastalǵan. Bes jasynan bastap zııatkerlik oıynǵa bet buryp, strategııa qurýdy, esepteýdi úırengen. Keıin tipti ózi oqıtyn lıseıde shahmat klýbyn da qurǵan.
Alaıda ýaqyt óte kele, joǵary synypqa ótken saıyn bos ýaqyttyń azaıǵanyn sezinedi. Birneshe baǵytty qatar alyp júrý qıyndaı bastaıdy. Ýaqytty tıimdi paıdalanyp, IT-salasyna kóbirek kóńil bólý maqsatynda, 10-synypta jalpy bilim beretin mektepke aýysady. Bul qadam onyń áleýetin ashýǵa múmkindik beredi. Jańa mektepte ol oqýshylar senimine ıe bolyp, mektep prezıdenti atanady. Uıymdastyrýshylyq qabiletin kórsetip, túrli is-shara ótkizip, orta qalyptastyrýǵa úles qosady.
Mektep ómirinde ol mańyzdy birnárseni baıqaıdy. Iаǵnı qatarlastary shet tilin túrli qosymsha arqyly qyzyǵa úırenedi. Al qazaq tiline kelgende mundaı zamanaýı quraldar joqtyń qasy. «Nege ana tilimizdi de dál sondaı qyzyqty formatta úırenbeske?» degen oı ony mazalaı bastaıdy. Sóıtip, osy suraq «SayRa» jobasynyń bastaýyna aınalady.
11-synypta kópshilik oqýshy ulttyq biryńǵaı testileýge daıyndalady. Al Nurlyhan bolsa basqa joldy tańdady. Synyptastary UBT-ǵa qyzý kirisip jatqanda, ol mobıldi qosymsha jasaýmen aınalysty. Biraq ol óz tańdaýyna sendi. Aıtýynsha, bul onyń IT-salasyndaǵy alǵashqy jobasy emes. Buǵan deıin onlaın kúndelik jasaý arqyly tájirıbe jınap úlgergen.
«SayRa» qosymshasynyń ereksheligi – onyń tolyqtaı jeke eńbekpen jasalýy. Joba barysynda ol eshqandaı komanda jınamaǵan. Investor da tartpaǵan. Barlyq tehnıkalyq jumysty ózi oryndap, jeke qarajatyn jumsaǵan.
Qosymshany ázirleý, testileý, App Store-ǵa shyǵarý – ár kezeńi kúrdeli úderis. Ásirese platformaǵa ornalastyrý talaptary men tekseristeri ońaı bolmaǵan. «Apple»-diń qatań talaptarynan ótip, halyqaralyq standarttarǵa saı ónim jasap shyǵardy. Qazirgi tańda «SayRa» qosymshasyn 500-ge jýyq adam júktep úlgergen. Eń qyzyǵy, sheteldik qoldanýshylar da qyzyǵýshylyq tanyta bastaǵan. Demek, bul jobanyń áleýeti bar.
Joba munymen toqtamaıdy. Kerisinshe, endi ǵana damýdyń bastapqy kezeńinde tur. Nurlyhannyń aldaǵy josparlary: qosymshaǵa AR tehnologııasyn engizý, kamera arqyly sóz aýdarý múmkindigi, ınterfeısti aǵylshyn, qytaı tilderine beıimdeý, tolyqqandy ulttyq sıfrlyq ónimge aınaldyrý.
«Kóp oqýshy UBT-ny bilimniń tolyq kórsetkishi sekildi kóredi. Bolashaǵymyz testileýge tikeleı baılanysty dep uǵady. Biraq olaı oılamaımyn. Bul tek bir kezeń ǵana. Eger naqty ıdeıań bolsa, ony keıinge qaldyrmaı, dál qazir bastaý kerek. «SayRa» – jaı qosymsha emes. Bul – qazaq tilin jańa formatta usynýǵa qosqan úlesim. Bolashaqta ony úlken ekojúıege aınaldyrǵym keledi», deıdi ol.
Mektepti aıaqtaǵan soń ol Astana IT University-ge túsýdi josparlap otyr. Árıne bul jobany kásibı deńgeıge kóterýdiń kelesi satysy bolmaq. Sonymen qatar oqýshy otandyq ınvestorlarmen jumys isteýge daıyn. О́ıtkeni kez kelgen startaptyń ósýine qoldaý men orta qajet.
Jas ázirleýshiniń bul qadamy qatarlastaryna naqty áreket arqyly úlgi bolary anyq. Onyń bastamasy qazaq tilin úırenýdi jańa deńgeıge shyǵaryp, sıfrlyq ortadaǵy qoldanysyn keńeıtýge serpin bermek. Bastysy, ol tehnologııany tutynýdyń emes, ony ulttyq mazmunmen baıytýdyń jolyn tańdady. «SayRa» – jeke joba ǵana emes, ulttyq qundylyqty zamanaýı formatta jańǵyrtýdyń bir kórinisi. Búgingi oqýshynyń bastamasy erteńgi iri ekojúıege aınalýy da ǵajap emes. Eń mańyzdysy – osyndaı talapty jastardyń kóbeıip, qoǵamǵa jańa serpin ákelýi.
