Almaty qalalyq qoǵamdyq densaýlyq saqtaý basqarmasynyń málimetinshe, jańa ortalyq aýyr jaraqat alǵan naýqastarǵa shuǵyl kómekten bastap, ońaltý kezeńine deıingi barlyq satyda mamandandyrylǵan qyzmet kórsetedi. Bastamany júzege asyrýǵa megapolıstegi jetekshi mekemelerdiń biri – №4 klınıkalyq aýrýhananyń tańdalýy tegin emes. Munda jylyna 19 myńdaı pasıent em qabyldap, 12 myńǵa jýyq operasııa jasalady. Máselen, 2025 jyly iri býyndardy endoprotezdeýge qatysty 2 250 operasııa sátti ótken. Qazirdiń ózinde jańa ortalyqty qurýǵa daıyndyq retinde aýrýhananyń qabyldaý bólimi tolyqtaı qaıta jańǵyrtyldy.
Mundaı ortalyqtyń ashylýy eldiń ońtústik óńirindegi travmatologııalyq qyzmetti úılestirýdi kúsheıtip, mamandardyń biliktiligin arttyrýǵa, ǵylymı zertteý baǵyttaryn damytýǵa jol ashady. Bul mańyzdy jobany Densaýlyq saqtaý mınıstrligi, qala ákimdigi, akademık N.Batpenov atyndaǵy Ulttyq ǵylymı travmatologııa jáne ortopedııa ortalyǵy tolyqtaı qoldap otyr.
Ortalyqty ashýǵa daıyndyq aıasynda aýrýhana bazasynda R.Vreden atyndaǵy Travmatologııa jáne ortopedııa ulttyq medısınalyq zertteý ortalyǵy (Reseı) mamandarynyń qatysýymen sheberlik synyptary men ǵylymı-tájirıbelik konferensııa ótti. Basqosý nátıjesinde ekijaqty yntymaqtastyq týraly memorandýmǵa qol qoıylyp, zamanaýı medısınalyq tehnologııalardy birlese engizý kózdeldi.
– Aýrýhanamyz dástúrli túrde travmatologııa salasyna mamandanǵan. Infraqurylymdy damytyp, emdeýdiń jańa tásilderin engizý arqyly bul baǵytty odan ári kúsheıtip kelemiz. Ortalyqtyń qurylýy jetekshi mamandarmen ózara tıimdi is-qımyldy keńeıtýge múmkindik beredi, – dedi №4 qalalyq klınıkalyq aýrýhananyń dırektory Birjan Dosmaıylov.
Halyqaralyq sarapshylar da jobanyń ózektiligin joǵary baǵalap otyr. R.Vreden atyndaǵy ortalyqtyń dırektory Rashıd Tıhılov: «О́ńirlik ortalyq qurý – der kezinde qolǵa alynǵan mańyzdy qadam. Qazirgi travmatologııa úzdiksiz tájirıbe almasý men jańa tehnologııalardy engizýdi talap etedi. Almatyda bul úshin barlyq jaǵdaı jasalǵan», dep atap ótti.
ALMATY
